සෞදි අරාබියේ මරණ දණ්ඩනයට නියම වී සිටින ශ්‍රී ලංකාවේ අනෝජන් සිවරාස වෙනුවෙන් සකස් කළ අභියාචනය එරට ශ්‍රේෂ්ඨාධිකරණය වෙත අද (11) ඉදිරිපත් කර තිබේ.
ශ්‍රී ලංකා සහ සෞදි නීතීඥ කණ්ඩායම්වල ඒකාබද්ධ ප්‍රයත්නයක ප්‍රතිඵලයක් ලෙස මෙම අභියාචනය ගොනු කර ඇත.
මෙම අභියාචනය සකස් කිරීම සඳහා ශ්‍රී ලංකා විශේෂ නීතිඥ කණ්ඩායමක් සහ සෞදි නීතිඥවරුන් අතර සාකච්ඡා වට කිහිපයක් පවත්වා ඇති අතර, එයසෞදි අරාබියාවේ ශ්‍රී ලංකා තානාපති ඕ.එල්. අමීර් අජ්වාඩ් මහතාගේ සම්බන්ධීකරණයෙන් රියාද්හි පිහිටි ශ්‍රී ලංකා තානාපති කාර්යාලය හරහා සංවිධානය කර තිබුණි.
සමාජ මාධ්‍ය ජාලයක මුහම්මද් නබී නායකයාට අපහාස වන අයුරින් පළ කරන ලද සටහනක් හේතුවෙන් සෞදි අභියාචනාධිකරණයක් විසින් අනෝජන් සිවරාස වෙත මෙම මරණ දණ්ඩනය නියම කර තිබුණි.
මීට පෙර පහළ අධිකරණයක් විසින් ඔහුට වසර පහක සිරදඬුවමක් නියම කර තිබුණද, පසුව අභියාචනාධිකරණය විසින් එම තීන්දුව වෙනස් කර මරණ දණ්ඩනය පැනවීය.
සෞදි අරාබියේදී මරණ දඬුවම හිමිව සිටින සිවරාසා අනෝජන්ගේ දණ්ඩනයට ඉවත් කරගැනීම සඳහා වන සාකච්ඡාවට එක්වූ මෙරට නීතිඥ කණ්ඩායම වන්නේ ජනාධිපති නීතිඥ උපුල් කුමාරප්පෙරුම, ජනාධිපති නීතිඥ ෆයිසර් මුස්තාෆා සහ අතිරේක සොලිසිටර් ජනරාල් අසාද් නවාවි යන මහත්වරුන්ය.
තව ද ජෙඩාහි ශ්‍රී ලංකා කොන්සල් ජනරාල් විනිසුරු එම්.ටී මොහොමඩ්, නීතිඥ ෆාරිස් ෆසාල් අබ්දුල් හෆීල් මොහොමඩ් සහ පාර්ලිමේන්තු මන්ත්‍රී ෆයිසර් මුස්තාපාගේ සම්බන්ධීකරණ ලේකම් මොහොමඩ් රියාස්ඩීන් සිල්මි යන අය ද මෙම දූත මණ්ඩලය නියෝජනය කරනු ලබයි.
