එක්සත් අරාබි එමීර් රාජ්‍යය දෙසට ඉරානයෙන් බැලස්ටික් මිසයිල දෙකක් එල්ල කළ බවට UAE බලධාරීන් චෝදනා කර තිබේ.
UAE ආරක්ෂක අංශ සඳහන් කර ඇත්තේ, ඉරානයෙන් එල්ල වූ මිසයිල දෙකක් හඳුනාගත් බවත්, ඉන් එක් මිසයිලයක් එරට මුහුදු සීමාවෙන් පිටතටත්, අනෙක් මිසයිලය මුහුදු සීමාව තුළටත් වැටී ඇති බවත්ය.
පසුව නිකුත් කළ නිවේදනයකින් UAE බලධාරීන් පවසා ඇත්තේ, සිදුකළ තක්සේරුවලදී එම මිසයිල දෙක මුහුදු ගමනාගමනය ඉලක්ක කර එල්ල කර ඇති බවට අනාවරණය වූ බවය.
කෙසේවෙතත්, ඉරාන විදේශ කටයුතු අමාත්‍යාංශ ප්‍රකාශක Esmaeil Baqaei එම චෝදනාව තරයේ ප්‍රතික්ෂේප කර තිබේ.
එවැනි ප්‍රකාශ කලාපීය විශ්වාසය සහ ආරක්ෂක ප්‍රයත්නවලට හානි කරන බවද ඔහු පවසා ඇත.
මේ අතර, ඇමෙරිකාව සමඟ සාම ගිවිසුමකට එළඹෙන තෙක් ගල්ෆ් කලාපයේ ප්‍රධාන නාවික මාර්ගයක් වන හෝර්මුස් සමුද්‍ර සන්ධිය වසා තබන බවට ඉරානය අනතුරු අඟවා තිබේ.
කලාපයේ පවතින උණුසුම් තත්ත්වය හේතුවෙන් UAE රාජ්‍යය ඉරානය සමඟ සියලු වෙළෙඳ සහ මූල්‍ය ගනුදෙනු නැවත දැනුම් දෙන තුරු අත්හිටුවීමටද පියවර ගෙන ඇත.
මිසයිල තර්ජනයක් පිළිබඳ කෙටි දුරකථන අනතුරු ඇඟවීමක් UAE වැසියන්ට නිකුත් කර පැය දෙකකට ආසන්න කාලයකට පසුව මෙම නිවේදනය නිකුත් කර තිබේ.
මේ අතර, UAE රාජ්‍යයට අයත් තෙල් සමාගමක් වන ADNOC හි තෙල් ප්‍රවාහන නෞකා පසුගිය සති කිහිපය තුළ අවස්ථා කිහිපයකදී ප්‍රහාරවලට ලක්ව ඇති බවද වාර්තා වේ.
