විදේශ රැකියා පොරොන්දු ලබා දී උස්බෙකිස්තාන ජාතික තරුණියක් ශ්‍රී ලංකාවට ගෙන්වා, බලහත්කාරයෙන් සහ තර්ජනය කරමින් ගණිකා වෘත්තියේ යෙදවීමේ චෝදනාවට වරදකරු වූ ත්‍රිරෝද රථ රියදුරෙකුට වසර 10 ක බරපතළ වැඩ සහිත සිරදඬුවම් සහ රුපියල් 10,000 ක දඩ මුදලක් නියම කිරීමට කොළඹ මහාධිකරණය නියෝග කර තිබේ.

මහාධිකරණ විනිසුරු ලංකා ජයරත්න මෙනවිය විසින් මෙම තීන්දුව ප්‍රකාශයට පත් කරන ලදී.

2021 ජනවාරි 01 වන දින කොළඹ හෝටලයේදී ඔක්සානා කර්පොවා නැමැති උස්බෙකිස්තාන ජාතික කාන්තාව ගණිකා වෘත්තිය සඳහා කුට්ඨනය කිරීම (Procuring for prostitution) සම්බන්ධයෙන් දණ්ඩ නීති සංග්‍රහයේ 360 අ (1) වගන්තිය යටතේ නීතිපතිවරයා විසින් මෙම නඩුව ගොනු කර තිබිණි.

වසර 2020 අගභාගයේදී, ඔක්සානාට ශ්‍රී ලංකාවේ විසූ ඇගේම රටේ කාන්තාවක වන 'ජෙස්මින්' හරහා ආකර්ෂණීය රැකියා යෝජනාවක් ලැබී ඇත. මසකට අමෙරිකානු ඩොලර් 1,500 ක වැටුපක් ලැබෙන රැකියාවක් හෝ දරුවන් බලාගැනීමේ කාර්යයක් ලබාදෙන බවට පොරොන්දු වෙමින් ජෙස්මින් විසින් එවන ලද ගුවන් ගමන් බලපත්‍රය සහ වීසා ඔස්සේ ඇය මෙරටට පැමිණ තිබේ.

නමුත් කටුනායක ගුවන්තොටුපළින් පැමිණි පසු ජෙස්මින් සහ ඇගේ ශ්‍රී ලාංකික ස්වාමිපුරුෂයා වන 'ලෝරන්ස්' නැමැති ත්‍රිරෝද රථ රියදුරා ඇයව පිළිගෙන සෘජුවම මීගමුව ප්‍රදේශයේ නිවසකට රැගෙන ගොස්, එදිනම බලහත්කාරයෙන් විදේශිකයෙකුට ලිංගික සේවය සඳහා අලෙවි කර ඇත.

පසුව ඇයව වැල්ලවත්තේ පිහිටි මහල් නිවාසයක රඳවා, ගමන් බලපත්‍රයද අත්පත් කරගෙන, කිසිදු සන්නිවේදන පහසුකමක් ලබානොදී පූර්ණ ලෙස ඔවුන්ගේ ග්‍රහණයට නතු කරගෙන ඇත.

මෙම පීඩනය ඉවසාගත නොහැකි වූ තැන ඔක්සානා රහසිගතව තම මවට දුරකථනයෙන් තොරතුරු දන්වා ඇති අතර, වින්දිත තරුණියගේ මව උස්බෙකිස්තාන පොලිසියට කළ පැමිණිල්ලකට අනුව, ශ්‍රී ලංකා අපරාධ පරීක්ෂණ දෙපාර්තමේන්තුව (CID) ක්‍රියාත්මක වී ඇයව මුදාගෙන රක්ෂිත නිවසකට යොමු කර තිබේ.

නඩු විභාගයේදී විත්තිකරු තමන් නිර්දෝෂී බව පැවසීමට උත්සාහ කළද, බැංකු වාර්තා ඇතුළු ප්‍රබල විද්‍යාත්මක  සාක්ෂි මගින් අපරාධය සනාථ වී ඇත.

විශේෂයෙන්ම, 2020 දෙසැම්බර් 31වැනිදා කොළඹ හෝටලයේදී ලිංගික සේවය ලබාගත් පුද්ගලයෙකු විසින් ලබාදුන් මුදලින් කොටසක් ලෝරන්ස්ගේ පෞද්ගලික බැංකු ගිණුමට තැන්පත් කර තිබූ බවට බැංකු වාර්තා මගින් තහවුරු වී ඇත.

පැමිණිල්ල විසින් ඉදිරිපත් කළ සාක්ෂි සාධාරණ සැකයකින් තොරව ඔප්පු වී ඇති බැවින්, මෙය සංවිධානාත්මකව සිදුකළ අපරාධයක් ලෙස තීරණය කළ මහාධිකරණ විනිසුරුවරිය විත්තිකරුට මෙලෙස බරපතළ වැඩ සහිත සිරදඬුවම් නියම කළාය.