ඔස්ට්‍රේලියාවේ සිඩ්නි නුවර පවත්වාගෙන ගිය දන්ත වෛද්‍ය සායනයක පැවති "දුර්වල ආසාදන පාලන ක්‍රමවේද" හේතුවෙන් එහි ප්‍රතිකාර ලැබූ රෝගීන් දහස් ගණනකට ලේ මගින් බෝවන වෛරස් ශරීරගත වී තිබීමේ අවදානමක් පවතින බව සෞඛ්‍ය බලධාරීන් අනතුරු අඟවයි.
බටහිර සිඩ්නි හි ස්ට්‍රැත්ෆීල්ඩ් ප්‍රදේශයේ වෛද්‍ය විලියම් ටැම් යටතේ ප්‍රතිකාර ලැබූ රෝගීන් මෙලෙස හෙපටයිටිස් B, හෙපටයිටිස් C සහ HIV වෛරස් වලට නිරාවරණය වී තිබිය හැකි බව නිව් සවුත් වේල්ස් සෞඛ්‍ය අමාත්‍යාංශය ප්‍රකාශ කර තිබේ.
ආසාදනය වීමේ අවදානම "අඩු මට්ටමක" පැවතියද, වෛද්‍යවරයකු හමුවී අදාළ රුධිර පරීක්ෂණ සිදුකර ගන්නා ලෙස රෝගීන්ගෙන් ඉල්ලා සිටී.
HIV සහ හෙපටයිටිස් වැනි රෝග දශක ගණනාවක් යනතුරු රෝග ලක්ෂණ නොපෙන්විය හැකි බැවින් පරීක්ෂා කිරීම අත්‍යවශ්‍ය බව සෞඛ්‍ය අංශය පවසයි.
පසුගිය වසර 25 පුරා මෙම වෛද්‍යවරයා රෝගීන් දහස් ගණනකට ප්‍රතිකාර කර ඇතත්, ඔවුන් සම්බන්ධ කර ගැනීමට අවශ්‍ය නිසි වාර්තා සායනය සතුව නොමැති වීම ගැටලුවක් ව ඇති බව සඳහන් වේ.
පසුගිය අප්‍රේල් මාසයේ සිදු කළ විගණනයකදී මෙම සායනයේ උපකරණ නිසි ලෙස විෂබීජහරණය නොකරන බවත්, පිරිසිදු කිරීමේ ක්‍රියාවලිය ඉතා දුර්වල බවත් අනාවරණය වී ඇත.
වෛද්‍ය විලියම් ටැම් මේ වන විට විශ්‍රාම ගොස් ඇති අතර ඔහුගේ වෛද්‍ය ලියාපදිංචිය ද අවලංගු කර ඇත.
ඔස්ට්‍රේලියාවේ මෙවැනි සිදුවීමක් වාර්තා වූ පළමු අවස්ථාව මෙය නොවේ. 2018 වසරේදී ද සිඩ්නි හි හෙබර්ෆීල්ඩ් ප්‍රදේශයේ සායනයක රෝගීන් 10,000කට පමණ මෙලෙස පරීක්ෂා වන ලෙස දැනුම් දුන් අතර, පසුගිය ඔක්තෝබර් මාසයේදී මෝර්ට්ඩේල් ප්‍රදේශයේ සායනයකදී ද මෙවැනිම තත්ත්වයක් වාර්තා වී ඇති බව සඳහන් වේ.
ප්‍රමිතියෙන් තොර දන්ත සායන සම්බන්ධයෙන් ඔස්ට්‍රේලියානු සෞඛ්‍ය බලධාරීන් දැන් දැඩි අවධානයෙන් පසුවෙයි.
