කඩවත ප්‍රදේශයේ අණ නොතකා ධාවනය කළ ත්‍රීරෝද රථයකට පොලීසියෙන් වෙඩිතැබීමේ සිදුවීම මූලිකව වෙඩි වැදුණු තරුණයාගේ මව විසින් සිදුකරන ලද ප්‍රකාශයක් සම්බන්ධයෙන් පොලිස් මාධ්‍ය ප්‍රකාශක, සහකාර පොලිස් අධිකාරී එෆ්. යූ. වුට්ලර් මහතා පැහැදිලි කිරීමක් සිදු කළේය.
ඊයේ(31) සිදුවූ මෙම සිදුවීමේදී අදාළ ත්‍රීරෝද රථයේ තරුණයින් "මත්ද්‍රව්‍ය ප්‍රවාහනය කළා" යැයි පොලීසිය පැවසූ බවට එම මව මාධ්‍ය වෙත කළ ප්‍රකාශය සම්පූර්ණයෙන්ම අසත්‍යයක් බව ඔහු පැවසීය.
අද(01) පැවති මාධ්‍ය හමුවකදී ඒ මහතා මේ බව පැවසීය.
ඕනෑම රථයක් පදවන රියැදුරෙකු නිල ඇඳුමින් සිටින පොලිස් නිලධාරියෙකුගේ සංඥාවකට නතරවීම එසේත් නැතහොත් අවනත විය යුතු බව නීතියේ සඳහන්ව ඇති කරුණක් බව පොලිස් මාධ්‍ය ප්‍රකාශක, සහකාර පොලිස් අධිකාරී එෆ්. යූ. වුට්ලර් මහතා මෙහිදී පැවසීය.
මෙහෙයුම් අතරතුර පොලිස් සංඥාවලට අවනත වී වාහන නතර කරන ලෙස මහජනතාවගෙන් ඉල්ලා සිටින පොලිස් මාධ්‍ය ප්‍රකාශකවරයා, එමගින් යම් අපහසුතාවක් සිදු වූවද එය සිදු කරනු ලබන්නේ සමස්ත රටේ සහ පුරවැසියන්ගේ ආරක්ෂාව හා යහපත උදෙසා බව අවධාරණය කළේය.
මේ අතර, මෝටර් රථ වාහන පනතට අනුව රියදුරු බලපත්‍රයක් නොමැති හෝ බාලවයස්කාර දරුවන්ට වාහන පැදවීමට ඉඩ සැලසීම වරදක් බවද, කඩවත සිදුවීමේදී බාලවයස්කාර තරණයාට අදාළ ත්‍රීරෝද රථය පැදවීමට ඉඩ ප්‍රස්ථාව ලබාදුන් තැනැත්තාට එරෙහිවද නීතිමය පියවර ගන්නා බව ප්‍රකාශ කළේය.
වැඩිහිටියන් හා ජ්‍යෙෂ්ඨ පුරවැසියන් ලෙස වගකීමෙන් කටයුතු කරන ලෙසත්, රටේ නීතිය හා සාමය තහවුරු කිරීමේ මෙම මෙහෙයුමට ශ්‍රී ලංකා පොලීසිය වෙත අවශ්‍ය සහයෝගය ලබාදෙන ලෙසත් සහකාර පොලිස් අධිකාරී එෆ්. යූ. වුට්ලර් මහතා වැඩිදුරටත් ඉල්ලා සිටියේය.
ඒ අනුව, දිවයින පුරා නීතිය හා සාමය ආරක්ෂා කිරීම සඳහා ශ්‍රී ලංකා පොලීසිය විසින් සිදු කරනු ලබන අත්අඩංගුවට ගැනීම්, හදිසි පරීක්ෂා කිරීම් සහ සෝදිසි මෙහෙයුම් තවදුරටත් තීව්‍ර කර ඇති බව පොලිස් මාධ්‍ය ප්‍රකාශකවරයා මෙහිදී පැවසීය.
නීතිවිරෝධී ක්‍රියාකාරකම්, මත්ද්‍රව්‍ය ජාවාරම්, සංවිධානාත්මක අපරාධකරුවන්, වෙඩික්කරුවන් සහ ඊට ආධාර අනුබල දෙන පුද්ගලයන් අත්අඩංගුවට ගැනීම සඳහා මෙම විශේෂ මෙහෙයුම් ක්‍රියාත්මක වන බවත්, ඊට මහජනතාවගෙන් විශාල සහයෝගයක් ලැබෙමින් පවතින බවත් පොලිස් මාධ්‍ය ප්‍රකාශකවරයා මෙහිදී පෙන්වා දුන්නේය.
