මාසික ඉන්ධන මිල සංශෝධනයට අනුව ඊයේ (31) මධ්‍යම රාත්‍රියේ සිට මේ මාසයට අදාළ ඉන්ධන මිල සංශෝධනය සිදුවිය යුතු වුවත් ඊට අදාළ සාකච්ඡාවක් නොපැවැත්වුණු බව ලංකා ඛනිජ තෙල් තොග ගබඩා පර්යන්ත සමාගමේ කළමනාකාර අධ්‍යක්ෂ මයුර නෙත්තිකුමාර මහතා පවසයි.
අවසන්වරට පසුගිය සැප්තැම්බර් මස 30 වැනිදා මධ්‍යම රාත්‍රියේ සිට ඉන්ධන මිල සංශෝධනය කිරීමට ලංකා ඛනිජ තෙල් නීතිගත සංස්ථාව පියවර ගත්තේය.
ඒ අනුව ඔක්ටේන් 92 පෙට්‍රල් ලීටරයක මිල රුපියල් 15කින් ඉහළ දැමුණු අතර, එහි නව මිල රුපියල් 414ක් ලෙස සටහන් විය.
කෙසේවෙතත් ඔක්ටේන් 95 පෙට්‍රල් ලීටරයක මිල සංශෝධනය නොකළ අතර එය රුපියල් 475ක් ලෙසටම පැවැතුණි.
සුපිරි ඩීසල් ලීටරයක මිල රුපියල් 50කින් වැඩි කිරීමට පියවර ගෙන තිබූ අතර එය රුපියල් 528ක් දක්වා ඉහළ යන ලදී.
එමෙන්ම රුපියල් 382ක්ව පැවති සුදු ඩීසල් ලීටරය මිලද රුපියල් 10කින් ඉහළ දැමුණු අතර එහි නව මිල සටහන් වූයේ රුපියල් 392ක් ලෙසිනි.
මේ අතර රුපියල් 285ක්ව පැවති භූමිතෙල් මිල සංශෝධනය නොකරන බව ලංකා ඛනිජ තෙල් නීතිගත සංස්ථාව වැඩිදුරටත් සඳහන් කළේය.
