SLS ලාංඡනය නොමැති හෙල්මට්වලට එරෙහි දිවයින පුරා විශේෂ වැටලීම් තවදුරටත් සිදු කරන බව පාරිභෝගික කටයුතු පිළිබඳ අධිකාරිය පවසයි.

ඒ අනුව පසුගිය 06 වැනිදා සිට මේ දක්වා වැටලීම් 84ක් සිදු කර ඇති එහිදී හෙල්මට් 327ක් අධිකාරිය භාරයට ගෙන ඇත.

යතුරුපැදි පදවන්නන්ගේ සහ පසුපස ගමන්කරුවන්ගේ ජීවිත ආරක්ෂාව තහවුරු කිරීමේ අරමුණින්, SLS 517 ප්‍රමිතියට අදාළ SLS ප්‍රමිති සහතික ලාංඡනය නොමැති යතුරුපැදි ආරක්ෂිත හිස්වැසුම් සම්බන්ධයෙන් පාරිභෝගික කටයුතු පිළිබඳ අධිකාරිය විසින් 2026 ඔක්තෝබර් 06 දින සිට දිවයින පුරා විශේෂ වැටලීම් වැඩසටහනක් ක්‍රියාත්මක කරන ලදී.

දිස්ත්‍රික්ක 21ක් පුරා සිදු කරන මෙම වැටලීම්වලදී විවිධ වෙළෙඳ නාම යටතේ අලෙවි කළ SLS ලාංඡනය නොමැති හෙල්මට් දිස්ත්‍රික්ක රැසකින් හඳුනාගෙන ගත් බව ඔවුන් සඳහන් කළේය.

විශේෂයෙන්ම එකම හෝ සමාන වෙළෙඳ නාම සහිත හෙල්මට් දිස්ත්‍රික්ක කිහිපයකින් නැවත නැවතත් හමුවීම හේතුවෙන්, සිල්ලර වෙළෙඳුන්ට එරෙහිව නීතිමය පියවර ගැනීමට පමණක් සීමා නොවී, සැපයුම්කරු, බෙදාහරින්නා, ආනයනකරු සහ නිෂ්පාදකයා දක්වා සැපයුම් ජාලය ඔස්සේ විමර්ශන පුළුල් කිරීමට පියවර ගනිමින් පවතී.

ගම්පහ, මුලතිව් සහ මන්නාරම දිස්ත්‍රික්කවලින් SLS ස්ටිකර් භාවිතය සම්බන්ධයෙන් කරුණු වාර්තා වී ඇති අතර, ඒ පිළිබඳවද වැඩිදුර විමර්ශන සිදු කෙරේ.

එමෙන්ම, ළමා සහ කුඩා ප්‍රමාණයේ හෙල්මට් අතරද SLS ලාංඡනය නොමැති නිෂ්පාදන හඳුනාගෙන ඇත.

එවැනි හෙල්මට් යතුරුපැදි හෝ වෙනත් වාහන භාවිත කරන්නන් සඳහා ආරක්ෂිත හිස්වැසුම් ලෙස අලෙවි කරන්නේ නම්, ඒවාද SLS 517 ප්‍රමිතියට අදාළව පරීක්ෂා කෙරේ.

තවද, නිසි බිල්පත් නොමැතිව හෝ නිෂ්පාදකයා සහ සැපයුම්කරු හඳුනාගත නොහැකි ආකාරයෙන් හෙල්මට් අලෙවි කරන අවස්ථාද අනාවරණය වී ඇති බැවින්, ඒ සම්බන්ධයෙන් අදාළ නීති යටතේ පියවර ගන්න බව පාරිභෝගික කටයුතු පිළිබඳ අධිකාරිය සඳහන් කළේය.

2026 ජූලි 27 වැනිදා සිට ක්‍රියාත්මක කළ දිවයින පුරා විශේෂ හෙල්මට් වැටලීම් වැඩසටහනේදී සාර්ථක වැටලීම් 98ක් සිදුකර, SLS ලාංඡනය නොමැති හෙල්මට් 431කට අධික ප්‍රමාණයක් අධිකාරිය භාරයට ගෙන නීතිමය පියවර ආරම්භ කර ඇත.