මෙට්රෝ බස් සේවාව හෙට (29) සිට කොළඹ නගරය පුරා ව්යාප්ත කරන බව ප්රවාහන, මහාමාර්ග සහ නාගරික සංවර්ධන අමාත්ය බිමල් රත්නායක මහතා පවසයි.
ජනාධිපතිවරයාගේ මූලිකත්වයෙන් ක්රියාත්මක කරන මෙම වැඩසටහන යටතේ බස් රථ 121ක් සේවයට එක්කරන බවද අමාත්යවරයා සඳහන් කළේය.
ප්රවාහන ආරක්ෂාව සහ පොදු ප්රවාහන සේවාව වැඩිදියුණු කිරීම සඳහා ක්රියාත්මක ජාතික වැඩපිළිවෙළ පිළිබඳ දැනුවත් කිරීමේ විශේෂ මාධ්ය හමුවකදී අමාත්යවරයා මේ බව සඳහන් කළේය.
පෞද්ගලික වාහන භාවිතය අවම කර පොදු ප්රවාහන සේවා භාවිතයට ජනතාව වැඩි වශයෙන් යොමු කිරීම මෙම වැඩපිළිවෙළේ අරමුණ බවද ඔහු පැවසීය.
මේ අතර, බස් ප්රමුඛතා මංතීරු ක්රමය මීට පෙර ශ්රී ලංකා පොලීසිය විසින් හඳුන්වා දී තිබුණද, විවිධ හේතූන් මත එය අඛණ්ඩව ක්රියාත්මක කිරීමට නොහැකි වූ බවද අමාත්යවරයා සඳහන් කළේය.
මෙට්රෝ බස් සේවාව හරහා නියමිත වේලාවට ධාවනය වන, සෑම ස්ථානයකම නතර නොවන සහ නීතිගරුක රියදුරන් හා කොන්දොස්තරවරුන් සහිත විධිමත් බස් සේවාවක් ලබාදීමට කටයුතු කර ඇති බවද ඔහු පැවසීය.
ඒ අනුව බස් ප්රමුඛතා මංතීරු ක්රමය ක්රියාත්මක කිරීම සඳහා මෙම ක්රමවේදය වඩාත් සුදුසු බව හඳුනාගෙන ඇති බවද අමාත්යවරයා සඳහන් කළේය.
උදෑසන 6.00 සිට 9.00 දක්වා එක් දිශාවකටත්, පස්වරු 4.00 සිට 7.00 දක්වා අනෙක් දිශාවටත්, මාර්ගයේ ඇති මංතීරු තුනෙන් එක් මංතීරුවක් පොදු ප්රවාහන බස් රථ සඳහා වෙන් කිරීමට කටයුතු කරන බවද ඔහු පැවසීය.
