1987 වසරේ සැප්තැම්බර් මස 15 වැනිදා සිට 26 වැනිදා දක්වා මාරාන්තික උපවාසයක නිරතව සිටින අතරතුර මියගිය LTTE සංවිධානයේ ත්රස්තවාදී නායකයෙකු වන තිලීපන් සැමරීමට පසුගිය දිනවල උතුරේ ඇතැම් පිරිස් දැරූ උත්සාහයන් සමාජය තුළ කතාබහට ලක්විය.
යාපනය නල්ලූර් කෝවිල පිටුපස මීට පෙර ඉදිකර තිබූ තිලීපන්ගේ පිළිරුව කඩා ඉවත්කිරීමට කටයුතු කර තිබුණත් එම ස්ථානයේ යළි ඔහුගේ ලෝකඩ පිළිමයක් ඉදිකර කිසියම් පිරිසක් සැමරුමක් සිදුකර තිබුණි.
කෙසේ වෙතත් ත්රස්තවාදය වැළැක්වීමේ පනත යටතේ LTTE නායකයෙකුගේ පිළිමයක් ඉදිකිරීම හෝ සැමරීම සිදුකළ නොහැකි අතර ඒ අනුව නල්ලූර් කෝවිල පිටුපස පිහිටි තිලීපන්ගේ පිළිමය අද (27) උදෑසන පොලීසිය විසින් ඉවත්කරනු ලැබීය.
තිලීපන්ගේ පිළිරුවක් එම ස්ථානයේ ඉදිකිරීම සම්බන්ධයෙන් යාපනය අධිකරණයට කරුණු වාර්තාකරන බව පොලිස් මාධ්ය කොට්ඨාසය සඳහන් කළේය.
මේ අතර මෙම පිළිරුව ඉවත්කිරිම සම්බන්ධයෙන් විරෝධය පලකරමින් සිවිල් සංවිධාන කිහිපයක් එම ප්රදේශයේදී අද විරෝධතාවක නිරතවූ අතර පාර්ලිමේන්තු මන්ත්රී සිවඥානම් ශ්රීදරන් මහතාද ඊට එක්වසිටියේය.
මේ සම්බන්ධයෙන් අද දෙරණ සිදුකළ විමසීමකදී පොලීසිය සඳහන් කළේ එම ස්මාරකය අදාළ ස්ථානයේ තැබීමට අවසර ලබාදී තිබුණේ ඊයේ දිනය දක්වා පමණක් බැවින් නියමිත කාලසීමාවෙන් අනතුරුව එම ස්මාරකය ඉවත්කිරීමට පියවර ගත් බවය.
