සෞදි අරාබියේදී මරණ දඬුවම නියමව ඇතැයි කියන ශ්රී ලාංකික තරුණයාට සමාව ලබාදෙන ලෙස ඉල්ලමින් වතුකරයේ තරුණයන් පිරිසක් අද (20) නිහඬ විරෝධතාවක නිරත විය.
හැටන් මල්ලිඅප්පු මංසන්ධියේදී පැවැත්වුණු මෙම විරෝධතාව සංවිධාන කර තිබුණේ, ශ්රී ලංකා හින්දු සංවිධාන සංසදය මගිනි.
සෞදි අරාබියේ සේවය කරන අනෝජන් සිවරාසා නමැති ශ්රී ලාංකික තරුණයාට මරණ දඬුවම නියම වී තිබුණේ යාපනය සිට කතරගම දක්වා හින්දු බැතිමතුන් පැමිණි පාදයාත්රාවක සිටි සුනඛයෙකුට කල්මුණේ ප්රදේශයේදී කිසියම් පුද්ගලයෙකු පා පහරක් එල්ල කිරීම සම්බන්ධයෙන් අනෝජන් සමාජ මාධ්ය ඔස්සේ ප්රතිචාර දැක්වීම හේතුවෙනි.
ඒ, එම ප්රතිචාරය තුළින් ඉස්ලාම් ආගමට අපහාසයක් සිදුවූ බවට චෝදනා කරමිනි.
තමා දැක්වූ අදහස සම්බන්ධයෙන් සමාව අයැදිමින් අනෝජන් සමාජ මාධ්ය ඔස්සේ පසුව වීඩියෝවක් ද පළකර තිබුණි.
නමුත් අනෝජන් පළකර තිබූ ෆේස් බුක් අදහස තුළ ඉස්ලාම් ආගමට හා ආගමික නායකයෙකුට අපහාසයක් වූ බව තීරණය කළ සෞදි පොලිසිය ඔහු අත්අඩංගුවට ගෙන වසර 5ක සිර දඬුවම් සහ සෞදි රියාල් මිලියන 3ක දඩයක් නියම කර තිබුණි.
පාර්ලිමේන්තු මන්ත්රී ශානක්කියන් රාසමානික්කම් මහතා ප්රකාශ කළේ, ශ්රී ලංකා රජය මේ පිළිබඳ මැදිහත්වීමෙන් සිදුකළ අභියාචනයකින් පසු එම දඬුවම මරණ දඬුවම දක්වා තීව්ර වී ඇති බවය.
කෙසේවෙතත් අනෝජන් සිවරාසා නමැති එම තරුණයා නිදහස් කරගැනීම සඳහා මේ වනවිටත් විශේෂ මැදිහත්වීමක් සිදුකර ඇති බව විදේශ කටයුතු අමාත්යාංශය සඳහන් කළේය.
