බෙංගාල ක්රිකට් සංගමය මගින් සිදුකළ පූර්ව ලේඛන පරීක්ෂාවකදී අනාවරණය වූ වයස් වංචාවන් හේතුවෙන්, ඉන්දීය වයස අවුරුදු 19න් පහළ කණ්ඩායමේ පාදඟ පන්දු යවන ක්රීඩක රෝහිත් යාදව්ට වසර දෙකක තරග තහනමක් පනවා තිබේ.
පසුගිය ජූලි මාසයේදී ශ්රී ලංකාවේ සංචාරය කළ ඉන්දීය යොවුන් කණ්ඩායම නියෝජනය කළ රෝහිත්ගේ නිල ලේඛන සහ සැබෑ දත්ත අතර මාස 27ක පරතරයක් පැවති බව මෙම පරීක්ෂණයේදී තහවුරු වී ඇත.
මෙම තහනම නිසා ඉදිරියේදී පැවැත්වීමට නියමිත ඔස්ට්රේලියානු 19න් පහළ කණ්ඩායමට එරෙහි එක්දින සහ ටෙස්ට් තරගාවලි සඳහා නම්කළ ඉන්දීය සංචිතයෙන්ද ඔහුව ඉවත් කර ඇත.
මෙම විශේෂ විමර්ශනයේදී රෝහිත් යාදව්ට අමතරව තවත් ක්රීඩකයින් 65කට වයස් වංචා චෝදනා මත තහනම් පනවා තිබේ.
2022 වසරේ බ.ඉ. කොදෙව් දූපත්හි පැවැති 19න් පහළ ලෝක කුසලානය දිනාගත් ඉන්දීය කණ්ඩායම නියෝජනය කළ වමත් වේගපන්දු යවන ක්රීඩක රවි කුමාර්ද ඒ අතර සිටීම සුවිශේෂීය.
2023 වසරේ සිට බෙංගාල ජ්යෙෂ්ඨ කණ්ඩායම නියෝජනය කරන රවි කුමාර්ගේ සැබෑ වයස සහ ඉදිරිපත් කළ ලේඛන අතර මාස 40කට වැඩි පරතරයක් තිබූ බව අනාවරණය වී ඇත.
ඒ අනුව ඔහුගේ මංගල තරගයේ සිට 2025-26 තරග වාරය දක්වා වූ සියලුම වයස් කාණ්ඩ වාර්තා අවලංගු කිරීමට සංගමය පියවර ගෙන තිබේ.
