පාකිස්තානයේ බලොචිස්තාන ප්‍රාන්තයේ දිළිඳුකම තවදුරටත් උග්‍ර විය හැකි බවට ලෝක බැංකුව අනතුරු අඟවා ඇතැයි විදෙස් මාධ්‍ය වාර්තා කරයි.
ගංවතුරෙන් පීඩාවට පත් ජනතාව සඳහා වෙන් කරන ලද බිලියන ගණනක නිවාස ව්‍යාපෘතියේ අරමුදල්, යටිතල පහසුකම් ව්‍යාපෘති වෙත යොමු කිරීම සම්බන්ධයෙන් සිය දැඩි අප්‍රසාදය පළ කරමින් ලෝක බැංකුව මේ බව ප්‍රකාශ කර ඇති බව පැවසෙයි.
මෙමගින් සිදුවන්නේ එම පවුල්වලට නිවාස ආධාර අහිමි වීම පමණක් නොවේ එමගින් ඔවුන් දැනට මුහුණදී සිටින දිළිඳුකම කාලයත් සමග තවදුරටත් දැඩි වීම බවද ලෝක බැංකුව පාකිස්තාන රජයට සහ බලොචිස්තාන ප්‍රාන්ත රජයට පෙන්වාදී ඇත.
මෙම ව්‍යාපෘතියේ ප්‍රතිලාභ ලැබීමට සුදුසුකම් ලැබූ පවුල්වලින් සියයට 84 ක්ම අතිශය දිළිඳු සහ අවදානම් සහගත මට්ටම්වල පසුවන්නන් බවද හෙළිවී තිබේ.
මෙවැනි කණ්ඩායම් සතුව ඉතුරුම් ඉතා අවම බවත්, නිල මූල්‍ය ණය පහසුකම් ලබා ගැනීමට නොහැකි බවත්, අර්බුද හමුවේ ඔරොත්තු දීමේ හැකියාව ඉතා අඩු බවත් ලෝක බැංකුව පෙන්වා දෙයි.
