පානීය ජල හිඟය නිරීක්ෂණයට හා කළමනාකරණයට ජාතික ජල සම්පාදන හා ජලාපවහන මණ්ඩලයේ සභාපති සහ සාමාන්‍යාධිකාරීවරයා විසින් විශේෂ මෙහෙයුම් කමිටුවක් පත්කර තිබේ.
පවතින වියළි කාලගුණය හේතුවෙන් ශීඝ්‍රයෙන් සිදෙමින් පවතින ජල මුලාශ්‍ර සහ එමඟින් සීමාවෙමින් පවතින නිෂ්පාදන ධාරිතාවය ඵලදායි ලෙස කළමනාකරණය කිරීමේ අවශ්‍යතාව සැලකිල්ලට ගනිමින්, ජල නිෂ්පාදනය සහ බෙදා හැරීම නිරීක්ෂණය කිරීමට මෙන්ම පාලනය කිරීම අරමුණෙන් අදාළ විෂය භාර නිලධාරීන්ගෙන් සමන්විත මෙම විශේෂ මෙහෙයුම් කමිටුව පත්කර ඇත.
මෙම කමිටුව මඟින් අදාළ ජල මුලාශ්‍රවල පවතින ගැටලු, ජල නිෂ්පාදන ධාරිතාවයන් සහ සැපයුම් රටාවන් අඛණ්ඩව නිරීක්ෂණය කිරීම, හඳුනාගත් කාල රාමු තුළ දිනපතා, සතිපතා තත්ත්වය සමාලෝචනය කිරීම සිදුකෙරේ.
ඒ අනුව පවතින තත්ත්වයන් පිළිබඳව කළමනාකරණ වාර්තා ඉදිරිපත් කිරීමට මෙන්ම අදාළ අංශ අතර සම්බන්ධීකරණය සාර්ථක ලෙස සිදුකරමින් ප්‍රමාණවත් ජල සැපයුමක් සුරක්ෂිත කිරීමට බලාපොරොත්තු වෙන බවද ජාතික ජල සම්පාදන සහ ජලාපවහන මණ්ඩලය නිවේදනය කරයි.
මෙමඟින් ඉදිරියේදී දෛනිකව දිගු කාලයන් සඳහා ජල සැපයුම් අත්හිටුවීම වළක්වා ගැනීමට මෙන්ම සියලුම පාරිභෝගිකයන් හට තම දෛනිකව අවශ්‍යතා සපුරා ගැනීමට හැකි වන පරිදි ජලය බෙදාහැරීම, පාලනය කිරීම සහ කළමනාකරණය කිරීමට පියවර ගනු ලබන අතර, සිඳී යන ජල මූලාශ්‍ර යථා තත්ත්වයට පත් වන තුරු මෙම කමිටුව ක්‍රියාත්මක වේ.
තවදුරත් පවතින වියළි කාලගුණය හේතුවෙන් සීමා වෙමින් පවතින ජල නිෂ්පාදන ධාරිතාවය මත ඉදිරියේදී පාරිභෝගික ජනතාව දැඩි අපහසුතාවයට පත්වීම වළක්වා ගැනීමටත්, අවශ්‍ය අවම ප්‍රශස්ත මට්ටමින් හෝ සේවාව පවත්වාගෙන යාමටත් පාරිභෝගිකයන් විසින් අත්‍යවශ්‍ය ම කටයුතුවලට පමණක් ජලය භාවිතා කිරීමෙන් සහයෝගය ලබාදීම මේ මොහොතේදී අත්‍යවශ්‍ය වන අතර එය අගය කොට සලකන බවද අදාළ නිවේදනයේ වැඩිදුරටත් සඳහන් වේ.
