දෙහිවල සහ කොහුවල ප්‍රදේශයන් හී සිදුවූ වෙඩි තැබීම් දෙකකට අදාළ සැකකරුවන් දෙදෙනෙකු බස්නාහිර පළාත් දකුණ දිසා භාර අපරාධ කොට්ඨාසය විසින් අත්අඩංගුවට ගෙන තිබේ.

පසුගිය 09 වැනි දින දෙහිවල පොලිස් වසමේ හෝටලක් තුළ එහි හිමිකරු වෙඩි තබා ඝාතනය කිරීම හා පසුගිය වසරේ දෙසැම්බර් 12 දින කොහුවල පොලිස් වසමේ බෝධියාවත්ත ප්‍රදේශයේදී ත්‍රීරෝද රථයකින් ගමන් කරමින් සිටි පුද්ගලයෙකුට වෙඩි තබා ඝාතනය කිරීමේ සිද්ධියට අදාළව ආධාර අනුබල දුන් සැකකරුවන් දෙදෙනෙකු මෙලෙස අත්අඩංගුවට ගෙන ඇත.

අත්අඩංගුවට ගන්නා අවස්ථාවේදී සැකකරුවන් සතුව තිබී අයිස් මත්ද්‍රව්‍ය ග්‍රෑම් 14 මිලිග්‍රෑම් 730ක්ද නිලධාරීන් භාරයට ගෙන තිබේ.

මෙලෙස අත්අඩංගුවට ගෙන ඇත්තේ අවුරුදු 18ක් වන බොරැල්ගමුව හා ගල්කිස්ස යන ප්‍රදේශවල පදිංචිකරුවන්ය.

සැකකරුවන් දෙදෙනා විදෙස්ගතව සිටින සංවිධානාත්මක අපරාධකරුවෙකු හා මත්ද්‍රව්‍ය ජාවාරම්කරුවෙකුගේ මෙහෙයවීම මත අපරාධයට ආධාර අනුබලදීම සිදුකර ඇති බවට අනාවරණය වී තිබේ.

සිද්ධිය සම්බන්ධව වැඩිදුර විමර්ශන බස්නාහිර පළාත් දකුණ දිසා අපරාධ කොට්ඨාසය විසින් සිදුකරනු ලබයි.