ශ්‍රී ලංකාව පූර්ණ ස්ථාවර ආර්ථිකයක් ළඟාකර ගැනීමට නම් සිය ප්‍රතිසංස්කරණ මාවතේ රැඳීසිටීම මෙන්ම තමන්ගේම ආර්ථික ප්‍රතිසංස්කරණ වැඩසටහනක් ක්‍රියාත්මක කිරීම අත්‍යවශ්‍ය බව ජාත්‍යන්තර මූල්‍ය අරමුදල පවසයි.
එමෙන්ම ලබන වසරේ ශ්‍රී ලංකාවේ ආර්ථික වර්ධනය සියයට 3.1ක් වනු ඇති බව ජාත්‍යන්තර මූල්‍ය අරමුදල පුරෝකථනයක කර ඇත.
ජාත්‍යන්තර මූල්‍ය අරමුදලේ ආසියා - ශාන්තිකර කලාපීය ආර්ථික තත්ත්වය පිළිබඳ ප්‍රවෘත්ති සාකච්ඡාවක් පසුගියදා පැවැත්වුණු අතර එහිදී ශ්‍රී ලංකාවේ ආර්ථිකය පිළිබඳවත් අවධානය යොමුවී තිබේ.
මෙහිදී ශ්‍රී ලංකාවේ ආර්ථික වර්ධන වේගය පිළිබඳ ද සාකච්ඡා කෙරුණි.
එහිදී එම නියෝජිතයන් පවසා ඇත්තේ, ශ්‍රී ලංකාවේ ආර්ථික වර්ධන වේගය සියයට 5ක ප්‍රතිශතයක පැවති අතර මෙම වසරේ පළමු අර්ධයේදී එය සියයට 4.8ක් වූ බවය.
එම ආර්ථික වර්ධන වේගයේ ඇතැම් සාධක යම් තාවකාලික තත්ත්වයක් බවත් එම තත්ත්වය සාමාන්‍යකරණය වීම මත ශ්‍රී ලංකාවේ ආර්ථික වර්ධන ප්‍රවණතාව ලබන වසරේදී සියයට 3.1ක් වනු ඇති බවත් ජාත්‍යන්තර මූල්‍ය අරමුදල පවසයි.
එමෙන්ම ශ්‍රී ලංකාවේ විදුලි ගාස්තු පිළිබඳවත් එහිදී අවධානය යොමුවී ඇති අතර ජාත්‍යන්තර මූල්‍ය අරමුදල පවසන්නේ, එය රටේ අයවැය සඳහා ද තීරණාත්මක සාධකයක් බවය.
ජාත්‍යන්තර මූල්‍ය අරමුදලේ ප්‍රධාන ප්‍රතිපත්තියක් වූ පිරිවැය ආවරණ ඉලක්ක සපුරාගැනීමට රජය සමත්වී ඇති බවත් එම නියෝජිතයන් පවසයි.
එම නිසා ඔක්තෝබර් මාසයේ විදුලි ගාස්තු පිළිබඳ තීරණය ධනාත්මක බවයි ඔවුන් පවසයි.
ඒ පිළිබඳ මීළඟ තීරණය ගැනීම සඳහා තවත් ප්‍රමාණවත් කාලයක් ඇති බවද ඔවුන් සඳහන් කර ඇත.
එමෙන්ම 2028 වසරේදී ශ්‍රී ලංකාව සිදුකළ යුතු ණය ගෙවීම් පිළිබඳ ද මෙහිදී අවධානය යොමුවී තිබේ.
ඒ පිළිබඳ ජාත්‍යන්තර මූල්‍ය අරමුදල පවසන්නේ, 2028 වසරේ ආදායම සම්බන්ධයෙන් මෙම වසරේ හා මීළඟ වසරේ ක්‍රියාකාරකම් බලපාන බවය.
දැනට පවත්නා ප්‍රතිසංස්කරණ ප්‍රගතියක් අත්කරගෙන ඇති බවත් ශ්‍රී ලංකාව පූර්ණ ස්ථාවර ආර්ථිකයක් කරා රැගෙනයාමට නම් මෙම මාවතේ රැඳීසිටීම මෙන්ම තමන්ගේම ප්‍රතිසංස්කරණ වැඩසටහනක් ක්‍රියාත්මක කිරීම අතිශය වැදගත් යැයි අවධාරණය කරන බවත් ජාත්‍යන්තර මූල්‍ය අරමුදල පවසයි.
