ජර්මනියේ මර්සිඩීස් - බෙන්ස් සැලකෙන්නේ සුඛෝපභෝගී මෝටර් රථ සන්නාමයක් ලෙසය.

එමඟින් බොහෝවිට ඉලක්ක කරගන්නේ ඉහළ ආදායම් සහිත ජනකොටස් වෙසෙන වෙළෙඳපොළය.

මේ සියවස ආරම්භයේදී නිදහස් ආර්ථිකයකට පිවිසෙනතුරු දේශීය මෝටර් රථ සන්නාමයන්ට සීමා වූ ඉන්දියාව මේ වනවිට එවැනි සුඛෝපභෝගී මෝටර් රථ සන්නාම සඳහා වෙළෙඳපොළක් බවට පත්වී ඇති බව ඇතැම්විට විශ්වාස කිරීමට අපහසු කරුණක් වේවි.

එහෙත් පසුගිය 2024 වසරේ මර්සිඩීස් බෙන්ස් මෝටර් රථ අලෙවිය වාර්තාගත ලෙස ඉහළ ගිය ඉන්දියාවේ තවත් නියෝජිත සේවා අලෙවිසල් 20ක් 2025 වසර තුළ විවෘත කිරීමට ජර්මානු සමාගම තීරණය කර ඇති බව රොයිටර්ස් ප්‍රවෘත්ති සේවාව වාර්තා කළේය.

නවදිල්ලිය සහ මුම්බායි නුවර ප්‍රධානකොට මර්සිඩීස් බෙන්ස් අලෙවිසැල් 125ක් දැනටමත් ක්‍රියාත්මක වේ.

නව අලෙවිසැල් ප්‍රධාන නගරවලින් පිටත ඉන්දියාව පුරා වෙනත් ප්‍රදේශවල විවෘත කිරීමට මර්සිඩීස් බෙන්ස් සැලසුම් කරයි.

මධ්‍යම ඉන්දියාවේ පිහිටි කාන්පූර්, නැගෙනහිර ඉන්දියාවේ පිහිටි පට්නා ඒ සඳහා තෝරාගෙන ඇත.

විශාල ජනගහණයකින් සමන්විත නොවූවත් මෙම නගරවල ඉහළ අන්තයේ මෝටර් රථ සහ සුඛෝපභෝගී භාණ්ඩ සඳහා ඉහළ ඉල්ලුමක් ඇති බව රොයිටර්ස් සඳහන් කළේය.

පසුගිය 2024 වසරේ මර්සිඩීස් බෙන්ස් මෝටර් රථ 19,500ක් ඉන්දියාවේ අලෙවි වී තිබෙන්නේ පෙර වසරට සාපේක්ෂව 12%ක වර්ධනයක් සටහන් කරමිනි.

තවත් සුඛෝපභෝගී මෝටර් රථ සන්නාමයක් වන BMW මෝටර් රථ 16,000ක් පමණ පසුගිය වසරේ ඉන්දියාවේ අලෙවි වී තිබේ.

ඉන්දියාවේ වසරකට අලෙවි වන මිලියන 4ක් පමණ මෝටර් රථ සංඛ්‍යාව සැලකූවිට සුඛෝපභෝගී මෝටර් රථ ප්‍රතිශතය 1%ක් පමණ වුවත් එය අනෙකුත් වෙළෙඳපොළට වඩා ශීඝ්‍රයෙන් වර්ධනය වන බව රොයිටර්ස් විශ්ලේෂකයා සඳහන් කළේය.

ඉන්දියාවේ ශීඝ්‍ර ආර්ථික වර්ධනය සමග බිහි වී ඇති නව මධ්‍යම පන්තියේ නව පරම්පරාව මේ විදියට සුඛෝපභෝගී සන්නාමයන්ට නැඹුරුවක් දක්වන බව වාර්තා වේ.

සිය දෙමාපියන්ගෙන් ව්‍යාපාර හිමිකාරත්වය ලැබූ නව පරම්පරාව මෙන්ම විදේශයන් හි නිරන්තරයෙන් සංචාරය කරන නව මධ්‍යම පන්තියේ ආකල්ප වෙනස්වීම ද මීට බලපා තිබේ.

ඔවුන් අල්පේච්ඡ ජීවිතයට හුරු වී ඉතිරි කිරීමට මුල්තැන දුන් සිය පැරණි පරම්පරාව මෙන් නොව, සුඛෝපභෝගී දිවි පෙවෙතකට පිවිසීමට වැඩි නැඹුරුවක් දැක්වීම මීට හේතුවයි.

ඉන්දියාවේ දී මේ විදිහට අලෙවි වර්ධනයක් වාර්තා කළත් 2024 වසරේ මර්සිඩීස් බෙන්ස් ගෝලීය මෝටර් රථ අලෙවිය 2023 වසරට සාපේක්ෂව සියයට 3කින් පමණ පහත වැටී තිබේ.

2024 වසරේ දී ලොව පුරා අලෙවි වූ මර්සිඩීස් බෙන්ස් මෝටර් රථ සංඛ්‍යාව දහනව ලක්ෂ අසූතුන් දහස් හාරසියය ක්.

අලෙවියේ එම පහත වැටීමට ප්‍රධාන වශයෙන් බලපා තිබෙන්නේ චීනයේ මර්සිඩීස් මෝටර් රථ අලෙවිය සියයට 70කින් සහ යුරෝපයේ අලෙවිය සියයට 3කින් අඩුවීමයි.

2024 වසරේ දී මර්සිඩීස් බෙන්ස් විද්‍යූත් මොටර් රථ අලෙවිය ද එක්ලක්ෂ අසූ පන්දහස් එකසියය දක්වා 2023 වසරට සාපේක්ෂව සියයට 23කින් පහත වැටී තිබේ.