පොලිස් වෙස්ගත් කොල්ල කල්ලිය කොටුවෙයි

පොලිස් වෙස් ගෙන නිවෙස්වලට බලහත්කාරයෙන් ඇතුළු වී නිවැසියන්ට පහර දී දේපොළ කොල්ලකන  කල්ලියක මහ මොළකරුවන පාදුක්කේ 'ගල් ඔළුවා' නමැති අපරාද කල්ලි සාමාජිකයා ඇතුළු සැකකරුවන් 10දෙනෙක් පොලීසිය විසින් අත්අඩංගුවට ගෙන තිබේ.

ඒ, බස්නාහිර පළාත් බුද්ධි කොට්ඨාශයේ නිලධාරීන්ගෙන් ලැබුණු තොරතුරක් මත හොරණ පොකුණුවිට ප්‍රදේශයේ සිදුකළ වැටලීමකදීය.

එහිදී හෙරොයින් මිලිග්‍රෑම් 10,000ක් සමග කොල්ල කල්ලියේ මහ මොළකරු වන 'ගල් ඔළුවා' නැමැත්තා ඇතුළු අපරාධ කල්ලියේ සැකකරුවන් 10 දෙනෙක් අත්අඩංගුවට ගැණුනි.

එමෙන්ම, සැකකරුවන් සන්තකයේ තිබී පොලිස් ඇඳුම්වලට සමාන ජැකට්, බොටම් කලිසම්, ඒවායේ ලාංඡන මුද්‍රණය කළ අච්චුවක්, රිවෝල්වර හැඩැති අවියක්, කඩු ඇතුළු තියුණු ආයුධ, යතුරු පැදි 4ක්, කොල්ල කෑ මුදල් යොදා මිලදී ගත් ත්‍රිරෝද රථ 2ක්, කොල්ල කෑ පවුම් 37ක රන් භාණ්ඩද සොයා ගැණුනි.

නිවාස, වාහන, රන් භාණ්ඩ ඇතුළු දේපොළ කොල්ල කෑම් 12ක් ඔවුන් විසින් සිදුකර ඇති බවත්, එහි වටිනාකම රුපියල් කෝටිය ඉක්මවන බවත්, ප්‍රශ්න කිරීම්වලදී අනාවරණ වී තිබේ.

පසුගියදා අඟුරුවාතොට, හල්තොට ප්‍රදේශයේ ව්‍යාපාරිකයෙකුගේ නිවසට පොලිස් වෙස් ගෙන පැමිණි රුපියල් ලක්ෂ 36ක මුදල් හා රන් භාණ්ඩ කොල්ල කා ඇත්තේද මෙම පිරිසම බව පොලීසිය පැවසුවේය.

රැඳවුම් නියෝග මත සිටි සැකකරුවන් ඊයේ (22) හොරණ මහෙස්ත්‍රාත් අධිකරණයට ඉදිරිපත් කළේය.

එහිදී ප්‍රධාන සැකකරු සතියක රැඳවුම් නියෝග මත රඳවාගෙන ප්‍රශ්න කිරීමටත්,සෙසු සැකකරුවන් නවදෙනා අගෝස්තු 3වන දා දක්වා රක්ෂිත බන්ධනාගාර ගතකිරීමටත් නියෝග කෙරුණි.