ගාස්තු නැති විශේෂ දුම්රිය සේවාවක්
June 17, 2024 03:09 pm
පොසොන් පොහොය නිමිත්තෙන් මිහින්තලය වෙත පැමිණෙන බැතිමතුන් වෙනුවෙන් ගාස්තු අය කිරීමකින් තොරව ක්‍රියාත්මක වන විශේෂ දුම්රිය සේවාවක් අද (17) සිට ආරම්භ කිරීමට දුම්රිය දෙපාර්තමේන්තුව පියවර ගෙන තිබේ.
එම විශේෂ දුම්රිය කිහිපය අනුරාධපුරය - මිහින්තලය අතර ක්‍රියාත්මක වීමට නියමිතව ඇත.
එමෙන්ම, කොළඹ සිට මහව දක්වා දුම්රියෙන් පැමිණෙන මගීන්ට මහව දුම්රිය ස්ථානයේ සිට අනුරාධපුර දක්වා ද විශේෂ බස් සේවාවක් ක්‍රියාත්මක කිරීමට පියවර ගෙන ඇත.
මේ වනවිට උතුරු දුම්රිය මාර්ගයේ මහව සහ අනුරාධපුර දුම්රිය ස්ථාන අතර ප්‍රදේශයේ ප්‍රතිසංස්කරණ කටයුතු අවසන් වී නොමැති බැවින් මෙවර පොසොන් පොහොය වෙනුවෙන් දුම්රිය යෙදවීමට නොහැකිවී තිබේ.
එම නිසා බැතිමතුන්ගේ පහසුව වෙනුවෙන් මහව සහ අනුරාධපුර අතර බස් රථ පමණක් 400ක් අතිරේකව යෙදවීමට පියවර ගෙන තිබේ.
මේ අතර අනුරාධපුරය හා මිහින්තලය අතර දුම්රිය මාර්ගය ප්‍රතිසංස්කරණය කිරිමෙන් අනතුරුව එය විවෘත කිරිම හා මංගල දුම්රිය ධාවනය අද පෙරවරුවේ ප්‍රවාහන අමාත්‍ය බන්දුල ගුණවර්ධන මහතාගේ ප්‍රධානත්වයෙන් අනුරාධපුර දුම්රිය ස්ථානයේ දී සිදුකෙරුණි.
ජාතික පොසොන් සතිය හෙට (18) සිට ආරම්භ වෙන අතර ඒ වෙනුවෙන් අටමස්ථානය කේන්ද්‍ර කරගනිමින් පිංකම් රැසක් සංවිධාන කර තිබේ.
මෙවර පොසොන් පුර පසළොස්වක පොහොය දිනය එළෙඹෙන 21 වනදාට යෙදී ඇත.
ඒ අනුව හෙට සිට ලබන 24 වනදා දක්වා පොසොන් සතිය ප්‍රකාශයට පත් කිරීමට බුද්ධ ශාසන අමාත්‍යාංශය පියවර ගෙන තිබේ.
අනුරාධපුරය, මිහින්තලය හා තන්තිරිමලය කේන්ද්‍ර කර මෙවරත් පොසොන් උත්සවය උත්කර්ෂවත් අයුරින් පැවැත්වීමට අවශ්‍ය කටයුතු සූදානම් කරමින් පවතී.
මීට සමඟාමීව මිහින්තලය කේන්ද්‍ර කර ගනිමින් විවිධ ආගමික වැඩසටහන් සංවිධානය කර තිබේ.
සම්ප්‍රදායානුකූලව මෙවර පොසොන් සතියේ ආරම්භයට පෙර පැවැත්වෙන විශේෂ පැන් පෙරහැර අද පස්වරුවේ පැවැත්වෙනවා.
ඉසුරුමුණිය රජමහා විහාරයේ සිට මහා විහාරය දක්වා පැන් පෙරහරෙන් මෙම පුණ්‍ය කටයුත්ත ආරම්භ වන අතර පොසොන් සතිය නිමිති කරගනිමින් පැවැත්වෙන පිරිත් සජ්ඣායනා වැඩසටහනද හෙට සිට ආරම්භ විමට නියමිතය.
මෙවර පොසොන් පොහොය නිමිත්තෙන් සැදැහැවතුන් විශාල පිරිසක් අනුරාධපුරයට හා මිහින්තලයට පැමිණෙනු ඇතැයි අපේක්ෂා කරන බව අනුරාධපුර දිස්ත්‍රික් ලේකම් ජනක ජයසුන්දර මහතා පවසයි.
