අමෙරිකානු ජනාධිපති ඩොනල්ඩ් ට්‍රම්ප්ගේ පරිපාලනය විසින් කැලිෆෝනියා ප්‍රාන්තයේ ලියාපදිංචි ඡන්දදායකයන් 20,000කට අධික පිරිසකගේ තැපැල් ඡන්ද ගණන් කිරීම තාවකාලිකව අත්හිටුවන ලෙස ඉදිරිපත් කළ හදිසි ඉල්ලීමක් එරට ශ්‍රේෂ්ඨාධිකරණය ප්‍රතික්ෂේප කර තිබේ.
ඊයේ (02) දිනයේ මෙම තීරණය ලබාදී ඇති අතර, අදාළ ඡන්දදායකයන්ගෙන් පිරිසක් අමෙරිකානු පුරවැසියන් නොවන බවට ෆෙඩරල් බලධාරීන් සැක පළ කර තිබිණි.
අධිකරණය මෙම තීරණය ලබාදී ඇත්තේ අධිකරණ දෙපාර්තමේන්තුව විසින් හදිසි ඉල්ලීම ඉදිරිපත් කර පැය කිහිපයක් ඇතුළත වීම විශේෂත්වයකි.
එම තීරණයත් සමඟ අදාළ ඡන්ද ගණන් කිරීම වැළැක්වීමට ට්‍රම්ප් පරිපාලනය දැරූ උත්සාහය අසාර්ථක වී තිබේ.
ශ්‍රේෂ්ඨාධිකරණය සිය තීරණය පිළිබඳව කිසිදු පැහැදිලි කිරීමක් ඉදිරිපත් කර නොමැති අතර, කිසිදු විනිසුරුවරයකු ප්‍රසිද්ධියේ විරෝධය පළ කර නොමැත.
අදාළ ඡන්ද ගණන් කිරීම අත්හිටුවන ලෙස ඉල්ලමින් ට්‍රම්ප් පරිපාලනය මීට පෙර කළ ඉල්ලීමක් ෆෙඩරල් අභියාචනාධිකරණය ද පසුගිය සිකුරාදා ප්‍රතික්ෂේප කර තිබිණි.
අමෙරිකානු අධිකරණ දෙපාර්තමේන්තුව ශ්‍රේෂ්ඨාධිකරණයට ඉදිරිපත් කළ ඉල්ලීමෙන් පෙන්වා දී තිබුණේ, අභියෝගයට ලක්ව ඇති ඡන්ද නීත්‍යනුකූල ඡන්ද සමඟ මිශ්‍ර වූ පසු ඒවා වෙන්කර හඳුනාගැනීමට නොහැකි වන බවය.
එබැවින් අදාළ ඡන්දදායකයන් අමෙරිකානු පුරවැසියන් බව තහවුරු කරන තෙක් ඔවුන්ගේ ඡන්ද වෙනම තබා ගණන් කිරීමෙන් වළකින ලෙස පරිපාලනය ඉල්ලා තිබිණි.
කෙසේ වෙතත්, කැලිෆෝනියා නීතිපති රොබ් බොන්ටා මෙම පියවර දැඩි ලෙස විවේචනය කරමින් කියා සිටියේ, එය මැතිවරණ ක්‍රියාවලියට බාධා කිරීමේ සහ ජනතාවගේ ඡන්ද අයිතිය උල්ලංඝනය කිරීමේ තවත් උත්සාහයක් බවය.
අමෙරිකානු මැතිවරණවලදී පුළුල් ලෙස ඡන්ද වංචා සිදුවන බවට ජනාධිපති ඩොනල්ඩ් ට්‍රම්ප් මීට පෙර ද ප්‍රකාශ කර ඇති නමුත්, 2020 ජනාධිපතිවරණය ඇතුළු මැතිවරණ සම්බන්ධයෙන් ඔහු ඉදිරිපත් කළ එවැනි චෝදනා සඳහා සාක්ෂි නොමැති බව වාර්තා වේ.
අමෙරිකාවේ සිදුකර ඇති අධ්‍යයන සහ ප්‍රාන්ත මට්ටමේ විගණනවලින් ද පුරවැසියන් නොවන පුද්ගලයන්ගේ නීතිවිරෝධී ඡන්ද භාවිතය ඉතා දුර්ලභ බව පෙන්වා දී තිබේ.
අමෙරිකානු ස්වදේශ ආරක්ෂක දෙපාර්තමේන්තුව විසින් සකස් කරන ලද ඡන්දදායකයන් 20,000කට අධික පිරිසකගේ නම් ඇතුළත් ලැයිස්තුවක් කැලිෆෝනියා ප්‍රාන්ත බලධාරීන්ට සහ ලොස් ඇන්ජලීස් ප්‍රාන්ත බලධාරීන්ට යොමු කර තිබිණි.
1996 වසරේ සම්මත කරන ලද ෆෙඩරල් නීතියක් අනුව, අමෙරිකානු පුරවැසියන් නොවන පුද්ගලයන් ෆෙඩරල් මැතිවරණවලදී ඡන්දය ප්‍රකාශ කිරීම අපරාධයක් ලෙස සැලකේ.
එම නීතිය ක්‍රියාත්මක කිරීමට කැලිෆෝනියා ප්‍රාන්තය බාධා කරන බවට චෝදනා කරමින් අධිකරණ දෙපාර්තමේන්තුව ඔක්තෝබර් 15 වැනිදා නඩුවක් ගොනු කළේය.
එහෙත් කැලිෆෝනියා බලධාරීන් පෙන්වා දෙන්නේ, අමෙරිකානු පුරවැසියන් නොවන පුද්ගලයන්ට ඡන්දය ප්‍රකාශ කිරීම වැළැක්වීම සඳහා ප්‍රාන්තය තුළ ප්‍රමාණවත් ආරක්ෂණ ක්‍රමවේද පවතින බවය.
තවද, ෆෙඩරල් බලධාරීන් විසින් ඡන්දදායකයන්ගේ තොරතුරු පරීක්ෂා කරමින් සකස් කරන ලද ලැයිස්තුවේ දෝෂ රැසක් තිබිය හැකි බවත්, පුරවැසියන් නොවන පුද්ගලයන් ලෙස හඳුනාගත් ඇතැම් පුද්ගලයන් පසුව අමෙරිකානු පුරවැසිභාවය ලබාගත් අය බව තහවුරු වී ඇති බවත් කැලිෆෝනියාව අධිකරණයට දැනුම් දී තිබේ.
