කොංගෝ රාජ්‍යයේ ඉබෝලා මාරාන්තික වෛරස් ව්‍යාප්තිය පාලනය කිරීම සඳහා අගනුවර වන කින්ෂාසා ඇතුළු තවත් ප්‍රදේශ තුනක මහජන ඒකරාශී වීම් සහ රැස්වීම් වහාම ක්‍රියාත්මක වන පරිදි තහනම් කිරීමට පියවර ගෙන තිබේ.
මේ වන විට ඉබෝලා ආසාදිතයන් වාර්තා වී ඇත්තේ අගනුවර සිට කිලෝමීටර 1,800ක් පමණ දුරින් පිහිටි නැගෙනහිර පළාත් තුනකින් වුවද, මිලියන 18ක ජනගහනයක් වෙසෙන කින්ෂාසා අගනුවරට වෛරසය ව්‍යාප්ත වීමේ දැඩි අවදානමක් පවතින බැවින් රජය මෙම තීරණය ගෙන ඇත. අගනුවරට අමතරව වෛරසය ව්‍යාප්ත වූ පළාත්වලට මායිම්ව පිහිටි ප්‍රදේශවලටද මෙම තහනම පනවා තිබේ.
කෙසේ වෙතත්, කොංගෝ රාජ්‍යයේ ප්‍රධාන විපක්ෂ දේශපාලන කණ්ඩායම් මෙම තහනමට එරෙහිව දැඩි විරෝධය පළ කර ඇත. ඔවුන් චෝදනා කරන්නේ ලබන ජූලි 8 වැනිදා පැවැත්වීමට නියමිත දැවැන්ත විරෝධතා පාගමනක් මර්දනය කිරීම සඳහා රජය සෞඛ්‍ය හේතූන් මුවාවෙන් සිදුකළ දේශපාලන කුමන්ත්‍රණයක් ලෙස මෙය හැඳින්විය හැකි බවය.
අගනුවරින් මෙතෙක් නිල වශයෙන් රෝගීන් වාර්තා වී නැතත්, කොංගෝවේ ඉබෝලා ප්‍රතිකාර මධ්‍යස්ථානයක සේවය කර නැවත ප්‍රංශය බලා ගිය ප්‍රංශ ජාතික වෛද්‍යවරයෙකු ඉබෝලා ආසාදිතයෙකු ලෙස හඳුනාගෙන තිබේ. ඔහු සිය රට බලා යාමට පෙර කින්ෂාසා අගනුවර හරහා ගමන් කර ඇති බව අනාවරණය වීමත් සමඟ බලධාරීන් දැඩි ලෙස කලබලයට පත්ව ඇත. ඒ අනුව වෛරසය බලපෑ ප්‍රදේශවල සිට පැමිණෙන සංචාරකයන් සඳහා දින 21ක නිරෝධායන කාලසීමාවක්ද රජය විසින් ප්‍රකාශයට පත් කර තිබේ.
පසුගිය සෙනසුරාදා දිනයේදී පමණක් නව ආසාදිතයන් 47 දෙනෙකු වාර්තා වීමත් සමඟ සමස්ත ආසාදිතයන් සංඛ්‍යාව 1,274ක් දක්වා ඉහළ ගොස් ඇත. මේ වන විට වාර්තා වී ඇති සමස්ත මරණ සංඛ්‍යාව 360කි. මීට අමතරව අසල්වැසි උගන්ඩාවෙන්ද ආසාදිතයන් 20 දෙනෙකු සහ මරණ 2ක් වාර්තා වී තිබේ.
