ගනේමුල්ල සංජීව ඝාතනය සඳහා ඉෂාරා සෙව්වන්දිට ගිනි අවිය ලබාදීම ඇතුළු අපරාධ කිහිපයක් සම්බන්ධයෙන් චෝදනා එල්ල වී සිටි මනෝජ් සුරංග ලියනගේ නොහොත් බටුවත්තේ චාමර මෙරටට රැගෙන එනු ලැබීය.

ඒ අසර්බයිජානයේ සැඟව සිටියදී එරට ආරක්ෂක අංශ මගින් අත්අඩංගුවට ගැනීමෙන් අනතුරුවය.

දිගු කලක් ඩුබායිහි සැඟවී සිට මීට වසරකට පමණ පෙර අසර්බයිජානය වෙත පළාගොස් සිටියදී මෙරට අපරාධ කල්ලි සාමාජිකයෙකු වන මනෝජ් සුරංග ලියනගේ නොහොත් බටුවත්තේ චාමර පසුගිය අප්‍රේල් 07 වෙනිදා එරට ආරක්ෂක අංශ මගින් අත්අඩංගුවට ගැනුණි.

ඒ එරට ආගමන විගමන නීති උල්ලංඝනය කරමින් ඔහුගේ පෙම්වතිය බව කියන අසර්බයිජාන කාන්තාවක් සමග සිටියදීය.

එරට රැඳවුම් කඳවුරක රඳවා සිටි සැකකරු මෙරටට රැගෙන ඒම සඳහා අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරීවරයෙක්, පොලිස් පරීක්ෂකවරයෙක් ඇතුළු තිදෙනකුගෙන් සමන්විත විශේෂ කණ්ඩායමක් අසර්බයිජානය බලා පිටව ගොස් තිබුණි.

සිදුකළ මූලික ප්‍රශ්න කිරීම්වලදී සැකකරු අනාවරණ කර ඇත්තේ ඩුබායිවල සිටින අපරාධකරුවන් අත්අඩංගුවට පත්වන බැවින් අසර්බයිජානය ආරක්ෂිත යැයි සිතා එරටට ගිය බවය.

සැකකරු රැගත් ගුවන් යානය ගුවන්ගතවීමට මොහොතකට පෙර ඔහු, "මම හාට් පේෂන් කෙනෙක්, මගේ පපුව රිදෙනවා මට ඉස්පිරිතාලේ යන්න ඕනේ, මාව මේගොල්ලෝ මරන්න ගෙනියන්නේ, මට බෙහෙත් දෙන්නෙත් නැහැ. මාව ඉස්පිරිතාලේ ගෙනියන්න." යනුවෙන් කෑගැසූ බව විමර්ශකයින් පවසයි.

කෙසේවෙතත්, ශ්‍රී ලන්කන් ගුවන්සේවයේ යූ.එල්.196 දරන ගුවන්යානයෙන් ඊයේ (10) රාත්‍රී 10.10 ට පමණ සැකකරු කටුනායක ගුවන්තොටුපොළ වෙත රැගෙන විත් තිබේ.

මෙලෙස දිවයිනට රැගෙන ආ බටුවත්තේ චාමර වරාය පොලීසියේ රඳවාගෙන ප්‍රශ්න කිරීමට නියමිතය.

ගනේමුල්ල සංජීව ඝාතනය කිරීම සඳහා භාවිත කළ බව කියන රිවෝල්වරය ඉෂාරා සෙව්වන්දිට ලබාදීම සහ ජාතික ලොතරැයි මණ්ඩලයේ හිටපු අධ්‍යක්ෂවරයකු වන තුසිත හල්ලොලුව වෙත ප්‍රහාරයක් එල්ල කළ සිද්ධිය මෙහෙයවීම යන අපරාධ පිටුපස මෙම සැකකරු සිටින බවට විමර්ශකයින් සැක පළ කරයි.

ඊට අමතරව මොහුට අපරාධ චෝදනා රැසක් එල්ලව ඇත.

රාගම බටුවත්ත ග්‍රාම සංවර්ධන මාවතේදී උපුල් අමරජිත් හෙවත් ආමි උපුල් නැමැත්තාගේ ඝාතනය මෙහෙයවීම, ග්‍රෑන්ඩ්පාස් වදුල්ලවත්ත ප්‍රදේශයේදී තමිල්නාඩු සුනීතා හෙවත් කුඩු සුනීතා නැමැත්තිය සහ ඇගේ සහායකයා ඝාතනය මෙහෙයවීම,ගම්පහ, ජාඇල පෑලියගොඩ ආශ්‍රිතව මත්ද්‍රව්‍ය ජාවාරම් මෙහෙයවීම යන චෝදනා ඊට අයත් වේ.

සැකකරු ජාත්‍යන්තර මත්ද්‍රව්‍ය ජාලය සමගත් සබඳතා පවත්වා ඇති අතර, ඉන්දියාවේ මත්ද්‍රව්‍ය ජාවාරම්කාර ඊබ්‍රහිම් ඩාවුඩ් කල්ලියේ මෙරට නියෝජිතයෙකු ලෙස කටයුතු කර ඇතැයි සැකයක් පවතින බව විමර්ශකයින් සඳහන් කරයි.

කොළඹ දිසාව භාර නියෝජ්‍ය පොලිස්පති නිශාන්ත ද සොයිසා, කොළඹ දිසා අපරාධ කොට්ඨාසය භාර ජ්‍යෙෂ්ඨ පොලිස් අධිකාරී ඉන්දික ලොකුහෙට්ටිගේ යන නිලධාරීන්ගේ මෙහෙයවීමෙන් කොළඹ අපරාධ කොට්ඨාශය මගින් සැකකරු සම්බන්ධ ඉදිරි විමර්ශන සිදුකිරීමට නියමිතය.