ඊශ්‍රායලය සහ අමෙරිකාව ඒකාබද්ධව සිදුකරන ඉරානයට එරෙහි යුද මෙහෙයුම ආරම්භ කර අදට (28) දින 29ක් ගතවී ඇත.
---------------------
Update - 5.02PM
ඉරානයේ යටිතල පහසුකම් හෝ ආර්ථික මධ්‍යස්ථාන ඉලක්ක කර ප්‍රහාර එල්ල වුවහොත්, ඊට ඉතා ප්‍රබල ලෙස ප්‍රතිප්‍රහාර එල්ල කරන බව ඉරාන ජනාධිපතිවරයා පවසා ඇති බව විදෙස් වාර්තා සඳහන් කරයි.
------------------------
Update - 4.54PM
ඩුබායි හි පිහිටි යුක්‍රේනයට අයත් ඩ්‍රෝන මර්දන පද්ධති ගබඩාවක් ඉලක්ක කර ඉරානය විසින් ප්‍රහාර එල්ල කර ඇති බව විදෙස් වාර්තා පවසයි.
------------------------
Update - 4.35PM
පාකිස්ථානය, සෞදි අරාබිය, තුර්කිය සහ ඊජිප්තුව යන රටවල විදේශ අමාත්‍යවරුන් හෙට පාකිස්ථානයේ ඉස්ලාමාබාද් නුවරදී විශේෂ හමුවක් පැවැත්වීමට නියමිත බව සඳහන් වෙයි.
----------------------------
Update - 2.49PM
ඕමානයේ සලාලා (Salalah) වරායට සැලකිය යුතු දුරකින් මුහුදේ තිබූ අමෙරිකානු හමුදා ආධාරක නෞකාවකට තම හමුදාව ප්‍රහාර එල්ල කළ බව ඉරානය පවසා තිබේ.
-----------------------
Update - 2.40PM
ඊශ්‍රායලය එල්ල කළ ප්‍රහාර නිසා ඉරානයේ ප්‍රධාන වානේ කර්මාන්තශාලාවක නිෂ්පාදන කටයුතු තාවකාලිකව නතර කර ඇති බව එරට මාධ්‍ය වාර්තා කරයි.
--------------------------
Update - 2.27PM
ඊශ්‍රායල ගුවන් සහ නාවික හමුදා එක්ව දකුණු ලෙබනනයේ ප්‍රදේශ කිහිපයකට ඊයේ රාත්‍රී කාලයේදී ප්‍රහාර එල්ල කර තිබේ.
එම ප්‍රහාර හේතුවෙන් හිස්බුල්ලා සංවිධානයේ ජ්‍යෙෂ්ඨ සාමාජිකයන් දෙදෙනෙකු මියගිය බව ඊශ්‍රායල හමුදාව පවසා තිබේ.
---------------------------
Update - 2.24PM
දකුණු ලෙබනනයේ 'අල්-හනියා' (al-Haniyah) නගරයට ඊශ්‍රායලය එල්ල කළ ගුවන් ප්‍රහාරයකින් පුද්ගලයන් සිව්දෙනෙකු මියගොස් තවත් නව දෙනෙකු තුවාල ලබා ඇති බව වාර්තා සඳහන් වෙයි.
-----------------------
Update - 1.53PM
ඊශ්‍රායලය විසින් දකුණු ලෙබනනයේ නගර කිහිපයකට අඛණ්ඩව ප්‍රහාර මාලාවක් එල්ල කර ඇති බව ලෙබනන් රජය වාර්තා කර තිබේ.
----------------------------
Update - 1.33PM
කුවේට් ජාත්‍යන්තර ගුවන්තොටුපොළ ඉලක්ක කර ගනිමින් ඩ්‍රෝන ප්‍රහාර කිහිපයක් එල්ල වී ඇති බව කුවේට් පුවත් ඒජන්සිය වාර්තා කරයි.
මෙම ප්‍රහාරවලින් ගුවන්තොටුපොළේ රේඩාර් පද්ධතියට බරපතල හානි සිදුවී තිබේ.
--------------------------
Update - 1.31PM
ඉරාකය තුළ පිහිටි අමෙරිකානු මධ්‍යස්ථානවලට සන්නද්ධ කණ්ඩායම් විසින් එල්ල කරන ප්‍රහාර වැළැක්වීම සඳහා දෙරටේම සහයෝගීතාව වැඩිකිරීමට අමෙරිකාව සහ ඉරාකය තීරණය කර ඇත.
-------------------------
Update - 1.04PM
මාසයක් තිස්සේ පවතින මෙම යුද්ධය අතරතුර ප්‍රථම වතාවට ඊශ්‍රායලයට බැලස්ටික් මිසයිල ප්‍රහාරයක් එල්ල කළ බව යේමනයේ හූති කැරලිකරුවන් නිල වශයෙන් ප්‍රකාශ කර ඇත.
---------------------------
Update - 12.27PM
ඉරානයේ සහය ලබන ඉරාක සන්නද්ධ කණ්ඩායම් එකතුවක් වන ඉරාකයේ ඉස්ලාමීය ප්‍රතිරෝධී කණ්ඩායමක් විසින් ජෝර්දානයේ ගුවන් කඳවුරු කිහිපයකට ප්‍රහාර එල්ල කර තිබේ.
-----------------------
Update - 12.01PM
කුවේට්හි තෙල් බැරලයක මිල ඩොලර් 8.10කින් ඉහළ ගොස් ඇති අතර, දැන් එහි මිල ඩොලර් 118.93 ක් වන බව කුවේට් පුවත් ඒජන්සිය වාර්තා කර තිබේ.
----------------------------
Update - 11.50AM
ඉරානයේ උතුරු ප්‍රදේශයේ පිහිටි ගොලෙස්තාන් (Golestan) පළාතේ සන්නද්ධ ප්‍රහාරයක් එල්ල කිරීමට සැලසුම් කළ පුද්ගලයන් දෙදෙනෙකු එරට ආරක්ෂක අංශ විසින් අත්අඩංගුවට ගෙන තිබේ.
---------------------------
Update - 11.17AM
බහරේනයේ අභ්‍යන්තර කටයුතු අමාත්‍යාංශය විසින් එරට වැසියන් වෙත හදිසි ආරක්ෂක පණිවුඩයක් නිකුත් කර තිබේ.
----------------------
Update - 11.13AM
තායිලන්තයේ තෙල් නැව්වලට හෝමූස් සමුද්‍ර සන්ධිය හරහා ආරක්ෂිතව ගමන් කිරීමට ඉරානය සමඟ එකඟතාවයකට පැමිණි බව තායිලන්ත අග්‍රාමාත්‍ය අනුටින් චාන්විරකුල් පවසා තිබේ.
-----------------------
Update - 10.22AM
අමෙරිකානු මධ්‍යම විමර්ශන කාර්යාංශයේ (FBI) ප්‍රධානී කෑෂ් පටෙල්ගේ (Kash Patel) පෞද්ගලික විද්‍යුත් තැපැල් ගිණුම හැක් කර ඇති බව එම ආයතනය තහවුරු කර තිබේ.
--------------------------
Update - 10.00AM
එක්සත් අරාබි එමීර් රාජ්‍යයේ අගනුවර වන අබුඩාබි නගරයට එල්ල වූ බැලස්ටික් මිසයිල එරට ආරක්ෂක අංශ විසින් අහසේදීම විනාශ කර ඇති අතර, එහි සුන්බුන් පතිත වීමෙන් ඉන්දීය ජාතිකයින් පස් දෙනෙකු තුවාල ලබා ඇත.
-------------------------
Update - 9.52AM
ඉරානයේ තෙහෙරාන් නුවර පිහිටි ඉරාන විද්‍යා හා තාක්ෂණ විශ්වවිද්‍යාලයට අද අලුයම ප්‍රහාරයක් එල්ල වී ඇති බව විදෙස් වාර්තා පවසයි.
--------------------------
Update - 9.30AM
යේමනයේ සිට ඊශ්‍රායලය දෙසට මිසයිල ප්‍රහාරයක් එල්ල වී ඇති බව ඊශ්‍රායල හමුදාව විසින් හඳුනාගෙන තිබේ.
--------------------------
Update - 8.59AM
ඊශ්‍රායලය විසින් ලෙබනනයේ බේරූට් අගනුවර දකුණු තදාසන්න ප්‍රදේශවලට මධ්‍යම රාත්‍රියේදී ප්‍රහාර එල්ල කර ඇත.
----------------------
Update - 7.58AM
සිරියාවේ අගනුවර වන දමස්කස් (Damascus) නගරයේ සහ ඒ අවට ප්‍රදේශවල ප්‍රබල පිපිරීම් කිහිපයක් සිදුවී ඇති බව සිරියානු රජය වාර්තා කර තිබේ.
------------------------
Update - 7.31AM
ඉරානය විසින් ඊශ්‍රායලය දෙසට මිසයිල ප්‍රහාර මාලාවක් එල්ල කර ඇති බව ඊශ්‍රායල හමුදාව තහවුරු කර තිබේ.
--------------------------
Update - 6.52AM
සෞදි අරාබියේ ප්‍රින්ස් සුල්තාන් ගුවන් කඳවුරට ඉරානයෙන් ප්‍රහාරයක් එල්ල වී තිබේ. ප්‍රහාරයෙන් අමෙරිකානු සෙබළුන් 12 දෙනෙකු තුවාල ලබා ඇති අතර, ඉන් දෙදෙනෙකුගේ තත්ත්වය බරපතළ බව සඳහන්ය.
