ඉන්ධන මිල සංශෝධනයේදී මිල සූත්‍රය අනුව කටයුතු නොකළ බව අමාත්‍ය නලින්ද ජයතිස්ස මහතා පවසයි.
කැබිනට් තීරණ දැනුම්දීමේ ප්‍රවෘත්ති සාකච්ඡාවට එක්වෙමින් අමාත්‍යවරයා වෙත යොමුවූ ප්‍රශ්නයකට පිළිතුරු ලබා දෙමින් ඔහු පැවසුවේ මෙම ඉන්ධන මිල වැඩි කිරීම සඳහා මිල සූත්‍රය භාවිතා නොකළ බවය.
ලෝක වෙළෙඳපොළ තුළ සුළු උච්ඡාවචනයක් සිදුවූයේ නම් මිල සූත්‍රය අනුව කටයුතු කළ හැකි නමුත් මෙම තත්ත්වය මිල සූත්‍රය අනුව ගැලපීමට නොහැකි බවත් අමාත්‍යවරයා සඳහන් කළේය.
තවද ලෝක වෙළෙඳපොළ තුළ ඩොලර් 70-78ට තිබූ බොරතෙල් බැරලයක මිල ඩොලර් 130 දක්වා ඉහළ යාමේදී එම අගය මිල සූත්‍රය අනුව ගැලපීමට නොහැකි බවත් පෙන්වා දුන් අමාත්‍යවරයා සඳහන් කළේ ඒ අනුව මෙම මිල වැඩිවීම මිල සූත්‍රය අනුව සිදු නොකළ බවද පැවසීය.
"සාමාන්‍යයෙන් ලෝක වෙළෙඳපොළේ අඩු උච්ඡාවඡනයක් වෙනවානම් මිල සූත්‍රයට ගලප්පන්න පුළුවන්. නමුත් මේ තත්ත්වය මිල සූත්‍රයෙන් ගලපන්න බෑ. ඒක ප්‍රමාණවත් වෙනවා 4-5ක අඩුවැඩි වීමක් වෙනවානම්... නමුත් ඩොලර් 70-78ට තිබුණ තෙල් බැරල් එකක් ඩොලර් 130ට ගියාම මොන සූත්‍රයටවත් ගලප්පන්න බෑ. අපි බලමු මැයි පළවෙනිදාට මිල සූත්‍රයක් එනවා. සූත්‍රයට අනුව නෙමෙයි ලෝක වෙළෙඳපොළේ බොරතෙල් මිල සහ පිරිපහදු කළ තෙල් මිල වැඩිවුණේ. ඒ සූතයෙන් ගණන් කරන්න බෑ මේ වෙලාවේ."
