අධ්‍යාපන අමාත්‍ය, අග්‍රාමාත්‍ය හරිනි අමරසූරියට එරෙහිව ගෙන ඒමට නියමිත විශ්වාසභංග යෝජනාවට ඉලංගෙයි තමිල් අරසු පක්ෂය සහාය නොදැක්වීමට තීරණය කර ඇත.
මාධ්‍ය හමුවක් අමතමින් එම පක්ෂයේ පාර්ලිමේන්තු මන්ත්‍රී සිවඥානම් ශ්‍රීධරන් මහතා මේ බව දැනුම් දී තිබේ.
අග්‍රාමාත්‍ය ධුරයෙන් සහ අධ්‍යාපන අමාත්‍ය ධුරයෙන් හරිනි අමරසූරිය ඉවත් කිරීම සඳහා විපක්ෂයේ පාර්ලිමේන්තු මන්ත්‍රීවරුන් විශ්වාසභංග යෝජනාවක් ගෙන ඒමට කටයුතු කරමින් සිටින අතර ඒ සඳහා අත්සන් ලබාගනිමින් සිටියි.
අදාළ විශ්වාසභංග යෝජනාවට තම පක්ෂය අත්සන් නොකරන බව පාර්ලිමේන්තු මන්ත්‍රි එස්. ශ්‍රීධරන් මහතා එහිදී ප්‍රකාශ කළේය.
මන්ත්‍රීවරයා පැවසුවේ, අග්‍රාමාත්‍යවරියට එරෙහිව එල්ල වී ඇති චෝදනා සම්බන්ධයෙන් නිසි සාක්ෂි ඉදිරිපත්ව නොමැතිවීම හේතුවෙන් තම පක්ෂය මෙම තීරණය ගත් බවය.
මතභේදාත්මක ඉගෙනුම් මොඩියුල ඉවත් කරන බවට මේ වන විටත් ප්‍රකාශ කර ඇති පසුබිමක, ඒ වෙනුවෙන් ඇයව ධුරයෙන් ඉවත් කරන ලෙස ඉල්ලා සිටීම දේශපාලන පළිගැනීමක් ලෙස තම පක්ෂය සලකන බව මන්ත්‍රීවරයා පවසයි.
මේ පිළිබඳව පාර්ලිමේන්තු කණ්ඩායම් රැස්වීමේ දී පක්ෂ නායකත්වය සමඟ සාකච්ඡා කළ බවත්, ඉදිරියේදී මෙම විශ්වාසභංගය පාර්ලිමේන්තුවට ඉදිරිපත් වුවද එයට පක්ෂව හෝ අග්‍රාමාත්‍යවරියට එරෙහිව ඡන්දය ප්‍රකාශ කිරීමට තම පක්ෂයට හැකියාවක් නොමැති බවත් මන්ත්‍රීවරයා පෙන්වා දෙයි.
රටට නව අධ්‍යාපන ප්‍රතිසංස්කරණයක් අවශ්‍ය බව පෙන්වා දුන් මන්ත්‍රීවරයා, ලෝකයේ අනෙකුත් රටවල් ප්‍රාථමික අධ්‍යාපනයට ලබාදෙන වැදගත්කම ශ්‍රී ලංකාව තුළ දක්නට නොමැති බවත් ලංකාවේ ප්‍රාථමික අධ්‍යාපනය පසුගාමී මට්ටමක පවතින බවත් මන්ත්‍රීවරයා පවසයි.
දෙමළ ජනතාවගේ ප්‍රශ්න සම්බන්ධයෙන් රජය පිළිබඳ විවිධ විවේචන පැවතියද, පුද්ගලිකව කාන්තාවකට එරෙහිව ගෙනයන අපහාසාත්මක ක්‍රියාවලට තම පක්ෂය හවුල් නොවන බවද මන්ත්‍රී සිවඥානම් ශ්‍රීධරන් මහතා වැඩිදුරටත් පැවසීය.
