පරාටේ නීතිය ගැන සජිත් ආණ්ඩුවෙන් කළ ඉල්ලීමක්
June 30, 2025 04:57 pm
ක්ෂුද්‍ර කුඩා මධ්‍ය පරිමාණ කර්මාන්තකරුවන් සහ ව්‍යවසායකයන් වෙනුවෙන් අවශ්‍ය සාධනීය විසඳුම් ලබා දෙන ලෙස විපක්ෂ නායක සජිත් ප්‍රේමදාස මහතා රජයෙන් ඉල්ලා සිටියි.
විපක්ෂ නායකවරයා මේ බව කියා සිටියේ අද (30) සිට පරාටේ නීතිය නැවත සක්‍රීය වීම නිසා නිසා අසරණ වන ක්ෂුද්‍ර කුඩා මධ්‍ය පරිමාණ කර්මාන්තකරුවන් සහ ව්‍යවසායකයන් සම්බන්ධයෙන් විශේෂ ප්‍රකාශයක් සිදු කරමින්ය.
ජුනි 30 වැනි දා මැදියම් රැයෙන් පසුව රටේ පරාටේ නීතිය ක්‍රියාත්මක වී ව්‍යවසායකයන්ගේ හා කර්මාන්තකරුවන්ගේ දේපොළ වෙන්දේසිය ඉතා වේගයෙන් ක්‍රියාත්මක කිරීමට අනුමැතිය හිමිවන බවත් ඒ තුළින් අප රටේ ක්ෂුද්‍ර කුඩා මධ්‍ය පරිමාණ කර්මාන්තකරුවන් සහ ව්‍යවසායකයන් රැසකගේ දේපොළ වෙන්දේසි වීමට නියමිත බවත් විපක්ෂ නායකවරයා පැවසීය.
මෙරට දළ දේශිය නිෂ්පාදනයට 50%කට වැඩි දායකත්වයක් ලබාදෙමින් 40 ලක්ෂයකට වැඩි ප්‍රමාණයකට රැකියා ලබා දෙන්නේ මේ ක්ෂුද්‍ර කුඩා මධ්‍ය පරිමාණ කර්මාන්තකරුවන් සහ ව්‍යවසායකයන් බවත් පරාටේ නීතිය නැවත වරක් ක්‍රියාත්මක කර ව්‍යවසායකයන්ගේ හා කර්මාන්තකරුවන්ගේ දේපොළ හා සම්පත් පරාටේ නීතිය හරහා වෙන්දේසි වන විට මේ ක්ෂේත්‍රයෙන් දළ දේශීය නිෂ්පාදනයට වෙන දායකත්වය අඩු වෙන බවට ජනාධිපතිවරයා ප්‍රමුඛ ආණ්ඩුව සිතිය යුතු බවත් එය සෘජුවම ආර්ථික වර්ධනයට බලපාන බවත් විපක්ෂ නායක සජිත් ප්‍රේමදාස මහතා සඳහන් කළේය.
ක්ෂුද්‍ර කුඩා මධ්‍ය පරිමාණ කර්මාන්තකරුවන් සහ ව්‍යවසායකයන්ගේ දේපොළ වෙන්දේසිය හරහා ඔවුන්ගේ ව්‍යාපාර කඩා වැටී එය දළ දේශීය නිෂ්පාදනයට බලපානව සේම විරැකියාව වර්ධනය වී අපනයන ප්‍රවර්ධනය වීමට වඩා අපනයන අඩු වීම සිදුවන බවත් පසුගිය රජය මෙන්ම වත්මන් රජය යන ආණ්ඩු දෙකම කළේ ක්ෂුද්‍ර කුඩා මධ්‍ය පරිමාණ කර්මාන්තකරුවන් සහ ව්‍යවසායකයන් මුලා කර රැවටීම බවත් මොවුන් මැතිවරණ ඉලක්ක කර ගෙන පරාටේ නීතිය තාවකාලිකව අවසන් කළත් දැන් ක්ෂුද්‍ර කුඩා මධ්‍ය පරිමාණ කර්මාන්තකරුවන් සහ ව්‍යවසායකයන් වෙනුවෙන් කිසිවක් නොකරන බවත් විපක්ෂ නායකවරයා පෙන්වා දුන්නේය.
ක්ෂුද්‍ර කුඩා මධ්‍ය පරිමාණ කර්මාන්තකරුවන් සහ ව්‍යවසායකයන් ඉල්ලා සිටියේ පරාටේ නිතිය තාවකාලිකව අත්හිටුවනවා සේම ණය හා පොලී කපා හැරිමක් ණය ප්‍රතිව්‍යුහගත කිරීමක් අපේක්ෂා කළ බවත් පාස්කු ප්‍රහාරය කොරෝනා කෝවිඩ් හා බංකොලොත්භාවය නිසා මොවුන් අසරණ වූ බවත් එම නිසා මොවුන්ට සහයෝගය ලබා දීම රජයේ වගකීම බවත් මොවුන්ගේ ණය ප්‍රතිව්‍යුහගත කිරිම මෙන්ම බොල් ණය කපා හැරිම, පොලියෙන් කොටසක් කපා හැරීම ආදිය සිදු කර මොවුන්ට නැවත ගොඩ ඒමට කාරක ප්‍රාග්ධනයක් ලබා දිය යුතු බවත් විපක්ෂ නායකවරයා වැඩිදුරටත් පැවසීය.
රජයට මේ ගැටලුවෙන් පැන යා නොහැකි බවත් තුනෙන් දෙකක පාර්ලිමේන්තු බලයක් මෙන්ම විධායක ජනාධිපති බලයක් ඇති ආණ්ඩුවක් ඇති නිසා ක්ෂුද්‍ර කුඩා මධ්‍ය පරිමාණ කර්මාන්තකරුවන් සහ ව්‍යවසායකයන් මේ ගැටලුවට උත්තර හා විසදුම් අපේක්ෂා කරන නිසා මේ ගැටලුවලට පැන යා නොහැකි බවත් විපක්ෂ නායකවරයා පැවසීය.
එබැවින් බොරුව රැවටීම නතර කර මේවාට විසඳුම් ලබා දෙන ලෙසත් වහාම ක්‍රියාත්මක වන ලෙස සීමාසහිත කාලයකට පරාටේ නීතිය ක්‍රියාත්මක කිරීම අත්හිටුවා ණය ප්‍රතිව්‍යුගත කිරිමක්, බොල් ණය මෙන්ම පොලිය ආදිය කපාහැර මොවුන් ට දිය හැකි සහන ලබා දිය යුතු බවත් බොරු සාකච්ඡා පවත්වා මංමුලාකළ යුඟයට තිත තබන ලෙසත් විපක්ෂ නායක සජිත් ප්‍රේමදාස මහතා වැඩිදුරටත් පැවසීය.
