ඉන්දියාවේ ප්‍රසිද්ධ නිලි ෂෙෆාලිගේ මරණයට හේතුව?

ඉන්දියාවේ ප්‍රසිද්ධ නිලි ෂෙෆාලි ජරිවාලාගේ මරණය සම්බන්ධයෙන් වෛද්‍යවරුන් තවමත් නිශ්චිත හේතුවක් සඳහන් කර නොමැති නමුත් හදිසියේම රුධිර පීඩනය පහත වැටීම නිසා ඇති වූ හෘදයාබාධයක් ඇය මියයාමට හේතු විය හැකිබව ඉන්දීය මාධ්‍ය වාර්තා කරයි.

42 හැවිරිදි ෂෙෆාලි ජරිවාලා පසුගිය 27 වනදා රාත්‍රියේ ඇයගේ නිවසේ දී මියගොස් තිබුණි.

'කාන්ටා ලගා' සංගීත වීඩියෝවෙන් දශක දෙකකට පෙර කීර්තියට වූ ෂෙෆාලි ජරිවාලා ඉන්දීය නිලියක් ලෙසත් නිරූපන ශිල්පිණියක් ලෙසත් කටයුතු කළාය.

ෂෙෆාලි ජරිවාලාගේ වෛද්‍යවරයා NDTV ඉන්දීය පුවත් සේවය වෙත තහවුරු කර ඇත්තේ ඇය පසුගිය වසර අටක කාලය තුළ වයස්ගත වීම වැළැක්වීමේ ප්‍රතිකාර ලබා ගත් බවය.

සමේ පැහැය වර්ධනය කිරීමට සහ වර්ණය වැඩි දියුණු කිරීමට භාවිතා කරන ග්ලූටතයෝන් සහ විටමින් සී යන දෙකම ඇගේ ප්‍රතිකාරයේ කොටසක්ව තිබී ඇති බව සඳහන් වේ.

වාර්තාවලට අනුව, ඇය ජුනි 27 වන දින නිතිපතා ගන්නා වයස්ගත වීම වැළැක්වීමට ගන්නා එන්නතක් ලබා ගෙන ඇත.

එදින රාත්‍රී 11 ට පමණ ඇයට දැඩි අසනීප තත්ත්වයක් දැනී ඇති අතර ඇය වෙව්ලන්නට පටන් ගෙන සිහිය නැති වී ඇති බව සඳහන් වේ.

ඇයව රෝහල් ගත කළ ද ඒ වන විටත් ඇය මියගොස් සිට ඇති බව වෛද්‍යවරු පවසා ඇත.

කෙසේ වෙතත් මූලික සොයාගැනීම් අනුව "අඩු රුධිර පීඩනය, හෘදයාබාධය සහ අධික ආමාශයික තත්ත්වය" මරණය හේතු විය හැකි බව සඳහන් වේ.

පොලීසිය විසින් ඇගේ නිවසින් වයසට යාම වැළැක්වීමේ ඖෂධ සහිත කුප්පි, විටමින් අතිරේක සහ උදරයේ ආම්ලික තත්ත්වය සහනය කරන ඖෂධ පෙති සොයාගෙන ඇති බව වාර්තා වේ.

වාර්තා වලට අනුව, ෂෙෆාලි ජුනි 27 වන දින ඇගේ නිවසේ පූජාවක් සඳහා නිරාහාරව ද සිට ඇත.

නිරාහාරව සිටියදී හෝ විජලනය අතරතුර වයස්ගත වීම වැළැක්වීමේ ඖෂධ ලබා ගැනීම හානිකර විය හැකි බව වෛද්‍යවරු පවසයි.

ෂෙෆාලි ජරිවාලාගේ මරණයට හේතු වූ දේ පිළිබඳ නිශ්චිත පිළිතුරක් බලාපොරොත්තුවෙන් සිටින අතර පශ්චාත් මරණ පරීක්ෂණ වාර්තාව ඉක්මනින් අපේක්ෂා කෙරේ.

කීර්තිමත් පුද්ගලයින් ඔවුන්ගේ පෙනුම පවත්වා ගැනීමට උත්සාහ කරයි. එය සාක්ෂාත් කර ගැනීම සඳහා ඔවුන් කරන්නේ කුමක්දැයි අපි නොදනිමු.  

වයස්ගත වීම වැළැක්වීමේ ප්‍රතිකාරවලට බරපතල අතුරු ආබාධ නොමැත, නමුත් ඇය කිසියම් හෝමෝන ප්‍රතිකාරයක් ද ලබා ගත්තේ නම්, එය අතුරු ආබාධ ඇති කළ හැකි බව වෛද්‍යවරු පවසා ඇත.

වයස අවුරුදු 40 සහ 50 ගණන්වල සිටින කීර්තිමත් පුද්ගලයින් කිහිපදෙනෙකු හදිසි හෘද රෝගවලට ගොදුරු වී ඇත.

ගායක කේ.කේ (53), නළු පුනීත් රාජ්කුමාර් (46), චිත්‍රපට නිෂ්පාදක රාජ් කෞෂාල් (50), විකට රංගන ශිල්පිනී රාජු ශ්‍රීවාස්තව් (58) සහ නළු සිද්ධාර්ත් ශුක්ලා (40) මෙයට ඇතුළත් වේ. 

1994 දී නිළියක් සහ විශ්ව රූ රැජිනක් වූ සුෂ්මිතා සෙන් (49) 2023 දී හෘදයාබාධයකට ගොදුරු වූ අතර ඇන්ජියෝප්ලාස්ටි සහ ස්ටෙන්ට් ස්ථානගත කිරීමකට භාජනය වී ඇත. 

මෙම රංගන ශිල්පීන්ගෙන් බොහෝ දෙනෙක් යෝග්‍යතා ක්‍රම අනුගමනය කළ ද හෘද රෝගවලට ගොදුරු වී ඇති බව සඳහන් වේ.

මෙම ඛේදජනක ලැයිස්තුවට එකතු වූ නවතම නම ලෙස ෂෙෆාලි ජරිවාලා බව ඉන්දීය මාධ්‍ය වැඩිදුරටත් සඳහන් කර ඇත.