දිවි ගමනට සමුදුන් දේශපාලන ප්‍රබලයා - අවසන් කටයුතු ඉරිදා

අභාවප්‍රාප්ත හිටපු පාර්ලිමේන්තු මන්ත්‍රී මාවෛයි සේනාධිරාජා මහතාගේ දේහය පිළිබඳ අවසන් කටයුතු එළැඹෙන ඉරිදා දින යාපනය, මාවිට්ටිපුරම් ප්‍රදේශයේ දී සිදුකිරීමට නියමිතය.

ඉලංකෙයි තමිල් අරසු පක්ෂයේ අනුශාසක සහ දේශපාලන කණ්ඩායම් නායකයාව සිටි මාවෛයි සේනාධිරාජා මහතා, නිවසේදී සිදුවූ හදිසි අනතුරක් හේතුවෙන් යාපනය ශික්ෂණ රෝහලට ඇතුළත් කර දැඩි සත්කාර ඒකකයේ ප්‍රතිකාර ලබමින් සිටියදී අභාවප්‍රාප්ත වී තිබේ.

මියයන විට ඒ මහතා 82 වන වියේ පසුවුණි.

1942 වසරේ ඔක්තෝබර් 27 වනදා යාපනය මාවිට්ටිපුරම් ප්‍රදේශයේදී උපත ලද මාවෙයි සේනාධිරාජා මහතා සිය මූලික අධ්‍යාපනය හදාරනු ලැබුවේ යාපනය නඩේශ්වරා විද්‍යාලයෙනි.

පසුව පේරාදෙණිය විශ්වවිද්‍යාලයෙන් බාහිර උපාධිය සම්පූර්ණ කළ ඒ මහතා 1966 වසරේ දෙමළ ප්‍රජාතන්ත්‍රවාදී පෙරමුණෙන් දේශපාලනයට පිවිසියේය.

1969 සිට 1983 දක්වා වූ කාලයේ අවස්ථා කිහිපයකදී ඔහු සිරගත වුණේ එවක යාපනයේ පැවති දේශපාලන ගැටුම්වලට සිදුකළ සෘජු මැදිහත්වීම් හේතුවෙනි.

30 වසරක සිවිල් යුද සමය පුරාම ක්‍රියාකාරී දේශපාලන නායකයෙකු ලෙස කටයුතු කළ සේනාධිරාජා මහතා රජයේ පාර්ශ්ව සහ එල්.ටී.ටී.ඊ. සංවිධානය සමඟ සාකච්ඡා කරමින් ජනතාවගේ ගැටලු විසඳීමට සෘජුව මැදිහත් වුණි. 

දෙමළ ජාතික සන්ධානය නියෝජනය කරමින් 2001 වසරේ මුල්වරට පාර්ලිමේන්තු වරම් දිනාගත් සේනාධිරාජා මහතා එතැන් සිට 2020 වසර දක්වා අඛණ්ඩව පාර්ලිමේන්තුව නියෝජනය කළේය.

උතුරු නැගෙනහිර දෙමළ දේශපාලන පක්ෂවල එකතුවෙන් සැදුම්ලත් දෙමළ ජාතික සන්ධානය නියෝජනය කළ ප්‍රධාන දේශපාලන පක්ෂය වූ ඉලංකෙයි තමිල් අරසු කච්චි පක්ෂයේ නායකයා ලෙසද 2014 වසරේ මාවෙයි සේනාධිරාජා මහතා පත්වුණි.

එතැන් සිට 2014 වසර දක්වා වසර 10ක් එම පක්ෂයේ නායකයා ලෙස කටයුතු කළ ඒ මහතා 2024 පක්ෂ නායකත්වයෙන් ඉවත්වීමෙන් පසු මියයන තුරුම ඉලංකෙයි තමිල් අරසු කච්චි පක්ෂයේ අනුශාසක සහ දේශපාලන කණ්ඩායම් නායකයා ලෙස කටයුතු කළේය.

ඉකුත් වසරේ ඔක්තෝබර් මස හෘදයාබාධයක් හේතුවෙන් රෝහල් ගතව ප්‍රතිකාර ලබාගත් සේනාධිරාජා මහතා පසුගිය 28 වනදා නිවසේ ඇදවැටීමෙන් හිසට සිදුවූ තුවාල හේතුවෙන් යාපනය ශික්ෂණ රෝහලේ දැඩි සත්කාර ඒකකයට ඇතුළත් කර ප්‍රතිකාර ලබමින් පසුවුණි.

රෝහල් ආරංචි මාර්ග පැවසුවේ, එම අනතුරෙන් සේනාධිරාජා මහතාගේ හිස අභ්‍යන්තරයේ රුධිර වහනයක් සිදුව තිබු බවය.