ගාල්ලේ ගඩ්ඩා අත්අඩංගුවට

යතුරුපැදි සොරකම් කර අපරාධකරුවන්ට හා මත්ද්‍රව්‍ය ජාවාරම්කරුවන්ට ලබාදෙන පුද්ගලයෙක් කළුතර කොට්ඨාස අපරාධ විමර්ශන කාර්යංශය විසින් අත්අඩංගුවට ගෙන තිබේ.

ඊයේ (11) එම සැකකරු අත්අඩංගුවට ගෙන තිබුණේ කළුතර දකුණ පොලිස් වසමේ පන්විලහේන වත්ත ප්‍රදේශයේදීය.

එලෙස අත්අඩංගුව ගෙන ඇත්තේ, ගාල්ල කිතුලම්පිටිය ප්‍රදේශයේ පදිංචි 28 හැවිරිදි "ගාල්ලේ ගඩ්ඩා"නමැති අන්වර්ථ නාමයෙන් හඳුන්වන පුද්ගලයෙකි.

සැකකරු අත්අඩංගුවට ගන්නා අවස්ථාවේදී ඔහු සතුව තිබී යතුරුපැදි 04ක්ද සොයාගෙන ඇත.

එම යතුරුපැදි ගාල්ල, අහුංගල්ල සහ කළුතර ප්‍රදේශවල සඟවා තිබියදී සොයගෙන ඇති අතර ඊට අමතර වෙනත් අංක තහඩු දෙකක්ද සොයාගෙන අත.

සැකකරු සම්බන්ධයෙන් සිදුකළ වැඩිදුර විමර්ශනයේදී අනාවරණය වී ඇත්තේ ඔහු යතුරුපැදි සොරකම් කර, එම යතුරුපැදි අපරාධකරුවන්ට හා මත්ද්‍රව්‍ය ජාවාරම්කරුවන්ට ලබාදෙ බවය.

මෙම සැකකරුට පුද්ගල පහරදීම්, හෙරොයින් ජාවාරම් සහ සොරකම් සම්බන්ධයෙන් මීට පෙර දිවයිනේ විවිධ අධිකරණවලින් නඩු කටයුතු පවතින බවටද තොරතුරු අනාවරණය වී ඇත.

සැකකරු අද (12) කළුතර මහෙස්ත්‍රාත් අධිකරණයට ඉදිරිපත් කිරිමට නියමිතය.