දකුණු අප්‍රිකාව ටෙස්ට් ලෝක ශූරතා අවසන් සටනට
December 29, 2024 06:51 pm
2023-25 ICC ලෝක ටෙස්ට් ශූරතා අවසන් මහා තරගයට සුදුසුකම් ලබාගැනීමට දකුණු අප්‍රිකානු කණ්ඩායමට අද (29) හැකිවිය.
ඒ, දකුණු අප්‍රිකාවේ සෙන්චූරියන්හිදී පාකිස්තානයට එරෙහිව අවසන් වූ පළමු ටෙස්ට් ක්‍රිකට් තරගයෙන් කඩුලු 2ක ජයක් ලැබීමත් සමගය.
2023-25 ලෝක ටෙස්ට් ශූරතාව යටතේ මහා තරගයට සුදුසුකම් ලැබූ පළමු කණ්ඩායමදකුණු අප්‍රිකාව වේ.
මෙම තරගයේ පළමුව පන්දුවට පහරදුන් පාකිස්තාතනය සියලු දෙනා දැවී ලකුණු 211ක් රැස්කළ අතර, ඊට පිළිතුරු ලෙස දකුණු අප්‍රිකාව පළමු ඉනිමට සියලු දෙනා දැවී ලකුණු 301ක් රැස්කිරීමට සමත් විය.
පාකිස්තාන කණ්ඩායමේ දෙවැනි ඉනිම ලකුණු 237කට සීමා වූ අතර, ඒ හේතුවෙන් දකුණු අප්‍රිකාවට ලකුණු 148ක පහසු ඉලක්කයක් හිමිවිය.
කෙසේ නමුත් එම ඉලක්කය කඩුලු 8ක් දැවී අසීරුවෙන් හඹායෑමට දකුණු අප්‍රිකාව සමත් විය.
