ජාතික දීපාවලී උත්සවය හැටන් මාණික්කපිල්ලෙයාර් කෝවිලේදී

හෙටට යෙදී ඇති දීපාවලී උත්සවය සිහිපත් කරමින් ජාතීක දීපාවලී උත්සවය අද පෙරවරුවේ හැටන් ශ්‍රී මාණික්කපිල්ලෙයාර් හින්දු කෝවිලේදී පැවැත්විය.

ඒ බුද්ධශාසන, ආගමික හා සංස්තකෘතික කටයුතු අමාත්‍ය ආචාර්ය හිනිදුම සුනිල් සෙනෙවි මහතාගේ ප්‍රධානත්වයෙනි.

කෝවිලට පැමිණි පිරිස පිළිගනු ලැබුවේ ප්‍රදේශයේ රාජ්‍ය ආයතන නියෝජනය කරන හින්දු භක්තික නිලධාරීන් විසිනි.

මෙහිදී මාණික්ක පිල්ලෙයාර් හින්දු කෝවිලේ ප්‍රධාන පූජක ශිව ශ්‍රී සත්ගුණ සංමධුර කුරුක්කල්තුමා විසින් ජාතික දීපාවලී උත්සවයට පැමිණි ආරාධිතයන් වෙනුවෙන් විශේෂ ආශිර්වාද පූජාවක් පවත්වනු ලැබීය.

එය සංවිධානය කර තිබුණේ මාණික්ක පිල්ලෙයාර් හින්දු කෝවිලේ භාරකාර මණ්ඩලය විසිනි.

කෝවිලේ පැවති ආශිර්වාද පූජාවෙන් අනතුරුව අමාත්‍ය ආචාර්ය හිනිදුම සුනිල් සෙනවි මහතා ඇතුලු පිරිස හින්දු චාරිත්‍රාංගවලින් සමන්විත විශේෂ පෙරහැරකින් හැටන් උත්සව ශාලාවක් වෙත කැදවාගෙන යනු ලැබීය.

එහිදී පැවති උත්සවයේදී පාසල් ළමුන් විසින් හින්දු සංස්කෘතිකාංග රැසක් ඉදිරිපත් කරනු ලැබූ අතර ජාතික දීපාවලි උත්සවය නිමිත්තෙන් සමරු තැපැල් මුද්දරයක්ද නිකුත් කෙරිණි.

මේ අතර හෙටට යෙදී ඇති දීපාවලි උත්සවය නිමිත්තෙන් පොලිස් මුලස්ථානය මඟින් හින්දු ආගමික පොලිස් නිලධාරින් වෙනුවෙන් සංවිධාන කළ දීපාවලි උත්සවය බම්බලපිටිය කදිරේෂන් කෝවිල් උත්සව ශාලාවේදී ඊයේ පැවැත්විය.

මෙම අවස්ථාවට විදේශ කටයුතු හා විදේශ රැකියා නියෝජ්‍ය අමාත්‍ය අරුන් හේමචන්ද්‍ර හා පොලිස්පති ප්‍රියන්ත වීරසූරිය යන මහත්වරුන් ඇතුළු පිරිසක් එක්ව සිටියේය.