කුලී පදනම මත නිවසක් ලබා ගනිමින් කුෂ් වගා කළ විදෙස් ජාතිකයෙකු අල්ලයි

අක්මීමන ප්‍රදේශයේ පිහිටි කුලී නිවසක කුෂ් වගාකළ බෙලරූස් ජාතිකයෙකු ගාල්ල දිසා අපරාධ කොට්ඨාසය මගින් අත්අඩංගුවට ගෙන තිබේ.

පොලීසිය පැවසුවේ අදාළ නිවසේ කාමර දෙකක් තුළ ඔහු සූක්ෂ්ම ලෙස මෙම කුෂ් වගාව සිදු කර ඇති බවය.

මෙරටට පැමිණෙන විදේශිකයින්ට අලෙවි කිරීම සඳහා ඔහු ඒවා වගා කර ඇති බව පොලීසිය විසින් සිදුකළ විමර්ශනයේදී අනාවරණය වී ඇත.

අදාළ නිවස කරාපිටිය රෝහලේ වෛද්‍යවරයෙකුට අයත් නිවසක් වන අතර සැකකරු විසින් අදාළ නිවස කුලී පදනම මත ලබා ගෙන ඇති අතර ඒ සඳහා මසකට රුපියල් ලක්ෂ එකහමාරක කුලී මුදලක්ද ගෙවා ඇති බවත් සඳහන් වේ. 

සිද්ධිය සම්බන්ධ වැඩිදුර විමර්ශන දකුණු පළාත භාර ජ්‍යෙෂ්ට නියෝජ්‍ය පොලිස්පති කිත්සිරි ජයලත් මහතාගේ උපදෙස් මත ගාල්ල දිසා අපරාධ කොට්ඨාසයේ අධ්‍යක්ෂ සහකාර පොලිස් අධිකාරී නාමල් පෙරේරා මහතා විසින් සිදුකරනු ලබයි.