ලෝක කුසලාන කාන්තා සටනේ සමාරම්භයට එක්වෙන ඩ්‍රීම් ස්ටාර් අනුශූරතාව දිනූ නුවන්ධිකා
September 30, 2025 01:44 pm
දෙරණ ඩ්‍රීම් ස්ටාර් ගායන තරගයේ 9වන අදියරේ අනුශූරතාව හිමිකරගත් නුවන්ධිකා සේනාරත්නට අද (30) පැවැත්වෙන කාන්තා එක්දින ලෝක කුසලාන ක්‍රිකට් තරගාවලියේ සමාරම්භක උත්සවයේදී ශ්‍රී ලංකා ජාතික ගීය ගැයීමේ අවස්ථාව හිමිව තිබේ.
නුවන්ධිකා සේනාරත්නට එම අවස්ථාව හිමිව ඇත්තේ, ප්‍රවීණ ඉන්දීය ගායන ශිල්පිණී ශ්‍රේයා ඝෝෂාල් සමග වීම විශේෂත්වයකි.
තමාට හිමිවූ අවස්ථාව පිළිබඳව නුවන්ධිකා සේනාරත්න සිය නිල ෆේස්බුක් පිටුවේ සටහනක් ද තබා සඳහන් කර ඇත්තේ, තමා කුඩා කළ සිට ආදරය කළ ප්‍රියතම සහ දක්ෂතම ගායිකාව සමඟ එකම වේදිකාවේ පුහුණුවීම් කිරීමට ලැබීම නිසැක වශයෙන්ම සිහිනයක් සැබෑවීමක් යන්නය.
එම සටහන පහතින් දැක්වේ.
කාන්තා එක්දින ලෝක කුසලාන ක්‍රිකට් තරගාවලියේ 13වැනි දිග හැරුම ශ්‍රී ලංකාවේ සහ ඉන්දියාවේ සම සත්කාරකත්වයෙන් අද (30) ආරම්භ වීමට නියමිතය.
අදින් ඇරඹෙන ලෝක කුසලාන තරගාවලිය නොවැම්බර් මස 2වැනිදා දක්වා පැවැත් වේ.
මෙවර තරගාවලියේදී කණ්ඩායම් 8ක් තරග වැදීමට නියමිතය.
ඉන්දියාවේ ක්‍රීඩාංගණ 4කදී සහ ශ්‍රී ලංකාවේදී එක් ක්‍රීඩාංගණයකදී තරගාවලියේ තරග ක්‍රියාත්මක වේ.
ලීග් ක්‍රමයට පැවැත්වෙන ලෝක කුසලාන මූලික වටයේදී සෑම කණ්ඩායමක්ම තරග 7කට මුහුණදීමට නියමිතය.
මෙවර තරගාවලියේ මූලික වටයේදී ශ්‍රී ලංකාව සහභාගි වන තරග 7න් 5ක් කොළඹ ආර්.ප්‍රේමදාස ක්‍රීඩාංගණයේදී පැවැත්වෙන අතර තරග දෙකක් ඉන්දියාවේදී පැවැත් වේ.
තරගාවලිය අරඹමින් ශ්‍රී ලංකාව සහ ඉන්දියාව අතර තරගය ඉන්දියාවේ ගුවහාති හීදි අද පස්වරු 3ට ආරම්භ වේ.
