ශ්‍රී ලංකාවට ලකුණු 7ක ජයක්
August 29, 2025 09:19 pm
දිල්ෂාන් මදුසංඛගේ විශිෂ්ට පන්දු යැවීම හේතුවෙන් සිම්බාබ්වේ කණ්ඩායමට එරෙහි පළමු එක්දින ක්‍රිකට් තරගයේ දී ලකුණු 07ක තියුණු ජයක් ලැබීමට සංචාරක ශ්‍රී ලංකා ක්‍රිකට් කණ්ඩායම අද (29) සමත් විය.
හරාරේ ක්‍රිකට් ක්‍රීඩාංගනයේදී පැවති මෙම තරගයේ දී හිමි වූ ලකුණු 299ක ඉලක්කයට පිළිතුරු ලෙස සිම්බාබ්වේ කණ්ඩායමට පන්දුවාර 50 අවසානයේ කඩුලු 8ක් දැවී ලබා ගත හැකි වූයේ ලකුණු 291ක් පමණී.
කෙසේ නමුත් මෙම තරගය අවසන් පන්දුවාරය දක්වාම තරගයේ ජය පැරදුම කණ්ඩායම් දෙකටම දෝලනය වී තිබුණි.
එහිදී සිම්බාබ්වේ කණ්ඩායමට කඩුලු 5ක් අතැතිව ලකුණු 10ක ඉලක්කයක් යොමුව තිබුණි.
කෙසේ වෙතත් එම පන්දුවාරය යොමු කළ දිල්ෂාන් මදුසංඛ ඒ වන විටත් ලකුණු අතර සිටි සිකන්දර් රාස (92) ඇතුළු කඩුලු ත්‍රිත්වයක් දවා ගනිමින් තරගයේ ජය ශ්‍රී ලංකාව දෙසට හරවා ගත්තේය.
සිම්බාබ්වේ කණ්ඩායම වෙනුවෙන් Sikandar Raza පන්දු 87කදී ලකුණු 92ක් රැස් කිරීමට සමත් වූ අතර Ben Curran පන්දු 90කදී ලකුණු 70ක් රැස් කළේය.
එමෙන්ම නායක Sean Williams පන්දු 54කදී ලකුණු 57ක් රැස් කළ අතර Tony Munyonga නොදැවී ලකුණු 43 රැස් කිරීමට සමත් විය.
පන්දු යැවීමේ දී ශ්‍රී ලංකා කණ්ඩායම වෙනුවෙන් අසිත ප්‍රනාන්දු කඩුලු 3ක් හා කමිඳු මෙන්ඩිස් එක් කඩුල්ලක් දවා ගත්තේය.
