දෛනික පොලිස් සෝදිසි මෙහෙයුමෙන් පුද්ගලයින් රැසක් අත්අඩංගුවට 

සංවිධානාත්මක අපරාදකරුවන්, මත්ද්‍රව්‍ය, නීති විරෝධී ගිනි අවි හා රථවාහන අත්අඩංගුවට ගැනීම සදහා දියත්කර ඇති දෛනික මෙහෙයුම් මාලාවේ තවත් එක් මෙහෙයුමක් ඊයේ (28) දිනය තුළදී ද සිදුකර තිබේ.

ඒ අනුව ඊයේ දිනය පුරා ශ‍්‍රී ලංකා පොලීසියේත්, පොලිස් විශේෂ කාර්ය බලකායේත් ත‍්‍රිවිධ හමුදාවේත් 6,180 දෙනෙකු සම්බන්ධ වී මෙම විශේෂ සෝදිසි මෙහෙයුම් සිිදු කර ඇත.

එහිදී පුද්ගලයන් 27,476 දෙනෙක් පරීක්ෂාවට ලක් කෙරුණු අතර වාහන 11,418 ක්ද යතුරු පැදි 8,117 ක ප‍්‍රමාණයක්ද පරීක්ෂාවට ලක් කර තිබේ. 

ඊයේ දිනයේදී දිවයින පුරා සිදු කළ වැටලීම්වලදී පමණක් මත්ද්‍රව්‍ය සම්බන්දයෙන් පුද්ගලයන් 850 දෙනෙකු අත්අඩංගුවට ගෙන ඇති අතර අපරාදවලට සෘජු ලෙස සම්බන්ධ පුද්ගලයන් 22 දෙනෙකුද වරෙන්තුකරුවන් 437 දෙනෙකුද අත්අඩංගුවට පත්ව ඇත.

එමෙන්ම මෙම වසරේ 2025 ජනවාරි මස 01 දින සිට 2025 අගෝස්තු මස 25 දින දක්වා හෙරොයින් කිලෝ 941.957ක ප‍්‍රමාණයක් ද අයිස් මත්ද්‍රව්‍ය කිලෝ 1413.326ක ප‍්‍රමාණයක්ද ගංජා කිලෝ 1,2558.468ක ප‍්‍රමාණයක්ද ප‍්‍රමාණාත්මකව අත්අඩංගුවට ගෙන ඇති අතර මෙම වසර තුළ දී පමණක් හෙරොයින් සම්බන්දයෙන් පුද්ගලයන් 4,3564 දෙනෙක්ද අයිස් සම්බන්දයෙන් පුද්ගලයන් 51,950 දෙනෙකුද ගංජා සම්බන්දයෙන් පුද්ගලයන් 46,513ක්ද අත්අඩංගුවට පත්ව ඇත.