සංචාරක කර්මාන්ත අංශයට අදාළව 2026 පූර්ව අයවැය සාකච්ඡාවක්

සංචාරක කර්මාන්ත පෞද්ගලික අංශයේ පාර්ශ්වකරුවන් සමඟ 2026 පූර්ව අයවැය සාකච්ඡාවක් අද (29) පස්වරුවේ ජනාධිපති කාර්යාලයේදී පැවැත්විණි.

ඒ ජනපති අනුර කුමාර මහතාගේ ප්‍රධානත්වයෙනි.

2026 වසරේ සංචාරක ‍ක්ෂේත්‍රයේ අපේක්ෂිත ඉලක්ක සපුරා ගැනීමේදී හුදෙක් ප්‍රවර්ධන වැඩසටහන් පමණක් ප්‍රමාණවත් නොවන බවත්, රාජ්‍ය සහ පෞද්ගලික අංශය ඒකාබද්ධ වූ නව උපායමාර්ගික වැඩසටහනක් ක්‍රියාවට නැංවිය යුතු බවත් එහිදී ජනාධිපති සඳහන් කළේය.

නුවරඑළිය, අනුරාධපුර, මහියංගනය සහ කතරගම ආදී ප්‍රදේශවල පිහිටි ජනාධිපති මන්දිර සහ අමාත්‍යවරුන්ගේ නිල නිවාස දෙස් විදෙස් සංචාරකයන් ඉලක්ක කර ගනිමින් සුවපහසු නිවාඩු නිකේතන ලෙස සංවර්ධනය කිරීමට ආයෝජනය කරන ලෙස ද මෙහිදී ජනපති විසින් ව්‍යාපාරිකයන්ට ආරාධනා කර ඇත.

එමෙන්ම වැඩිදුරටත් අදහස් දක්වමින් ඔහු සඳහන් කර සිටියේ ඒ වෙනුවෙන් විධිමත් වැඩපිළිවෙළක් නුදුරේදීම ක්‍රියාවට නංවන බවය.