ඉරානය පුටින් සමග සාකච්ඡාවකට සැරසෙයි
June 22, 2025 03:57 pm
එළැඹෙන සඳුදා දින රුසියානු ජනාධිපතිවරයා හමුවීමට නියමිත බව ඉරාන විදේශ අමාත්‍ය අබ්බාස් අරග්චි පවසයි.
අමෙරිකාව විසින් ඉරානයට එල්ල කරන ලද ප්‍රහාරය සම්බන්ධයෙන් සජීවීව ප්‍රකාශයක් නිකුත් කරමින් ඉරාන විදේශ අමාත්‍යවරයා පැවසුවේ තමන් අද දින මොස්කව් වෙත පියාසර කරන බවත් එළැඹෙන සඳුදා දින රුසියානු ජනාධිපති ව්ලැඩ්මීර් පුටින් සමග සාකච්ඡාවක නිරත වන බවත්ය.
"රුසියාව ඉරානයේ මිතුරෙක් අපි සැමවිටම එකිනෙකා සමග සාකච්ඡා කර අපගේ ස්ථාවරයන් සම්බන්ධීකරණය කරනවා හෙට මම රුසියානු ජනාධිපතිවරයා සමඟ බැරෑරුම් උපදේශන පවත්වන අතර අපි එකිනෙකා සමඟ වැඩ කිරීම දිගටම කරගෙන යන්නෙමු" යැයි ඉරාන විදේශ අමාත්‍යවරයා මෙහිදී පැවසීය.
මේ අතර ඉස්තාන්බුල්හි පැවති මෙම විශේෂ ප්‍රකාශයේදී ඉරාන විදේශ අමාත්‍යවරයා පැවසුවේ ඉරානය කිසිම වරදක් කර නොමැති බවත් ඉරානය න්‍යෂ්ටික අවි සොයන බවට බොරු චෝදනාවක් එල්ල කිරීමෙන් ඉරානයට පහර දිය යුත්තේ මන්දැයි තමන්ට නොතේරෙන බවය.
තවද ඉරානයේ න්‍යෂ්ටික මධ්‍යස්ථානවලට ඇමරිකානු ප්‍රහාරයක් එල්ල කිරීමෙන් පසු රාජ්‍ය තාන්ත්‍රිකභාවය විකල්පයක් නොවන බව ඉරාන විදේශ අමාත්‍යවරයා මෙහිදී සඳහන් කළේය
"ට්‍රම්ප් අමෙරිකානු ඡන්ද දායකයින් පාවා දුන්නා"
අද දින අමෙරිකානු ප්‍රහාරවල ප්‍රතිඵලයක් ලෙස ට්‍රම්ප් ඉරානය පමණක් නොව ඔහුගේම අධාරකරුවන් ද පවා දී ඇති බව ඉරාන විදේශ අමාත්‍යවරයා මෙහිදී පැවසීය.
"රාජ්‍ය තාන්ත්‍රිකභාවය සඳහා අපගේ කැපවීම අනිසි ලෙස භාවිතා කිරීමෙන් ඔහු ඉරානය පමණක් නොව ඔහුගේම ඡන්දදායකයින් ද රවටා ඇත," ඉරාන විදේශ අමාත්‍යවරයා පවසයි.
"අමෙරිකානු ප්‍රහාරය සමාව දිය නොහැකියි"
"රාජ්‍ය තාන්ත්‍රිකභාවයට දොර" සැමවිටම විවෘතව තිබිය යුතු වුවද, දැන් එය එසේ නොවේ" යනුවෙන් ඔහු පැවසීය.
එමෙන්ම ඉරානයේ න්‍යෂ්ටික බලාගාර වෙත ඉල්ල වූ එක්සත් ජනපද ප්‍රහාරය ජාත්‍යන්තර නීතිය යටතේ සමාව දිය නොහැකි ලෙස උල්ලංඝනය කිරීමක් බවද විදේශ අමාත්‍යවරයා සඳහන් කළේය.
