සයුරෙන් එතෙර
කලාපයේ හුදකලා වූ මියන්මාරය තව තවත් චීනයට සමීප වෙයි
November 7, 2024 11:17 am
මියන්මාරයේ ප්‍රජාතන්ත්‍රවාදී ලෙස තේරී පත්වූ අවුන් සාන් සුකීගේ රජය පෙරළා දමා 2021 වසරේ හමුදා කුමන්ත්‍රණයකින් බලයට පත්වූ මිලිටරි ජුන්ටාවේ නායක මින්-ඔන්-හ්ලයින් චීනයේ සංචාරයක් ආරම්භ කළේය.
ආසියාන් සංවිධානය තුළ පවා හුදෙකලා වී සිටින මියන්මාරයට වඩාත් වැදගත් අසල්වැසියා වන චීනයට ඔහු පැමිණියේ හමුදා කුමන්ත්‍රණයෙන් පසු ප්‍රථම වතාවටය.
හමුදා කුමන්ත්‍රණයෙන් පසු රටේ ප්‍රජාතන්ත්‍රවාදී බලවේග ආයෝමය හස්තයකින් මර්දනය කිරීමට කටයුතු කළත් මියන්මාරය අද පත්වී ඇත්තේ අස්ථාවර වාතාවරණයකටය.
විශේෂයෙන් මියන්මාරයේ චීන දේශසීමාව ඔස්සේ මේ වනවිට පැනනැගී ඇත්තේ අරාජික තත්ත්වයකි.
සුළු ජාතික සන්නද්ධ කණ්ඩායම්, හමුදා රජයට එරෙහි විපක්ෂ කණ්ඩායම් හා එක්වී මේ වනවිට විශාල ප්‍රදේශයක පාලනය සියතට ගෙන තිබේ.
මෙලෙස සිය දේශසීමාව අස්ථාවරවීම චීනයේ විශේෂ අවධානයට ලක්ව ඇති කරුණකි.
මියන්මාරයේ අස්ථාවරභාවය ඔවුන් සමග සිය උපක්‍රමීය සහ ව්‍යාපාරික අභිලාෂයන්ට තර්ජනයක් බව චීනය වටහාගෙන තිබේ.
මේ නිසා බටහිර රටවල සම්බාධකවලට මුහුණදෙන මියන්මාර හමුදා රජය සමග යහපත් සම්බන්ධතාවක් පවත්වාගැනීමට චීනය කටයුතු කරයි.
මියන්මාර රාජ්‍ය රූපවාහිනී සේවාව ප්‍රකාශ කළේ මින්-ඔන්-හ්ලයින් චීනයේ නිල සංචාරය සඳහා කල්වේලා ඇතිව නික්මුණු බවය.
චීනයේදී ඔහු කලාපීය සමුළු කිහිපයකට සහභාගීවීමට නියමිත බවද එම මාධ්‍ය වාර්තා සඳහන් කළේය.
චීනයේ කුන්මින් හිදී මිකොං උප කලාපීය ක්‍රමෝපාය ආර්ථික සහයෝගීතා සංවිධානයේ රැස්වීමකට සහභාගී වන මියන්මාර මිලිටරි ජුන්ටා නායකයා කාම්බෝජ, ලාඕස සහ වියට්නාම නායකයින් සමග ද සාකච්ඡා කිරීමට නියමිත බව මියන්මාර රූපවාහිනිය සඳහන් කරයි.
එමෙන්ම වඩාත් වැදගත් ලෙස චීන බලධාරීන් සමග පවත්වන සාකච්ඡාවලදී ද්විපාර්ශ්වික සබඳතා වැඩි දියුණු කිරීම මෙන්ම ක්ෂේත්‍ර රැසක ආර්ථික සහ සංවර්ධන සහයෝගීතාව ඉහළ නැංවීම පිළිබඳව මියන්මාර මිලිටරි ජුන්ටා නායකයා අවධානය යොමුකරනු ඇත.
සුළු ජාතික සහ අනෙකුත් ප්‍රතිරෝධී සන්නද්ධ කණ්ඩායම්වලට එරෙහි යුද්ධයේදී මියන්මාරයේ ප්‍රධාන අවි සැපයුම්කරුවන් වන්නේ චීනය සහ රුසියාවය.
මියන්මාරයේ ප්‍රධාන වෙළෙඳ සහකරු වන චීනය එරට පතල්, තෙල් සහ ගෑස් නල මාර්ග ආදියේ ඩොලර් බිලියන ගණනක ආයෝජන සිදුකර තිබේ.
මියන්මාරයේ තවත් යටිතල පහසුකම් රැසක් සංවර්ධනය කරනු ලබන්නේ චීනය විසිනි.
මියන්මාරය හරහා දැවැන්ත තෙල් සහ ගෑස් නල මාර්ග ඉදිකරන චීනය, මියන්මාරයේ බෙංගාල බොක්කට නිරාවරණය වූ ගැඹුරු වරායක් ඉදිකිරීමට ද සැලසුම් කරයි.
චීනයේ මෝටර් රථ කර්මාන්තය සහ සුළං බලශක්ති ක්ෂේත්‍ර සඳහා අවශ්‍ය විරල ඛනිජ මියන්මාරයෙන් ආනයනය කෙරෙයි.
2021 වසරේ අප්‍රේල් මාසයේ ඉන්දුනීසියාවේ ජකර්තා නුවර පැවැති ආසියන් සංවිධානයේ සමුළුවට සහභාගීවීමෙන් පසු මින්-ඔන්-හ්ලයින් විදේශ සංචාරයකට එක්වී තිබුණේ රුසියාවේ පමණි.
එහෙත් මියන්මාරයේ දේශපාලන අර්බුදයට සාමකාමී විසඳුමක් ගෙන ඒම සඳහා ඉදිරිපත් කළ යෝජනා ක්‍රියාත්මක නොකිරීම නිසා ඉන් පසුව පැවති ආසියානු සමුළු සඳහා මියන්මාර නායකයාට හෝ රජයේ නිලධාරීන්ට ඇරයුම් කර නොමැත.
චීනය විසින් මේ ආකාරයෙන් මියන්මාර මිලිටරි ජුන්ටාව පිළිගැනීම මියන්මාර ප්‍රජාතනන්ත්‍රවාදී විපක්ෂයේ දෝෂ දර්ශනයට ද ලක්වී තිබේ.
ජාතික එකමුතු රජය ලෙස නම් කළ මියන්මාර විපක්ෂයේ ප්‍රකාශකයා සඳහන් කළේ මියන්මාර ජනතාවට අවශ්‍ය ස්ථාවරත්වය, සාමය සහ ආර්ථික වර්ධනය වැළකී ඇත්තේ මිලිටරි ජුන්ටාව නිසා බවය.
මේ නිසා ඔවුන්ට ලබාදෙන රාජ්‍ය තාන්ත්‍රික පිළිගැනීම සම්බන්ධයෙන් යළි සලකා බලන ලෙස ද විපක්ෂය චීන රජයෙන් ඉල්ලා තිබේ.
කෙසේ නමුත් චීනය පවසන්නේ හමුදා රජය විසින් ලබන වසරේ පැවැත්වීමට සැලසුම්කර ඇති මහ මැතිවරණය සඳහා තමන් සහාය ලබාදෙන බවය.
යෝජිත එම මැතිවරණය සඳහා සංගණනයක් ද දැන් ආරම්භ කර තිබේ.
කෙසේ නමුත් මිලිටරි ජුන්ටාව මෙම මැතිවරණය පැවැත්වීමට සැරසෙන්නේ තමන්ට අභියෝගයක් වන ප්‍රජාතන්ත්‍රවාදී දේශපාලන පක්ෂ රැසක් විසුරුවා හැරීමෙන් අනතුරුවය.
