නැගෙනහිර ජැටිය - සිකුරාදා සිට දැඩි වෘත්තීය ක්‍රියාමාර්ග
January 27, 2021 10:55 am
රටේ සම්පත් විදේශීකරණයට එරෙහිව එළැඹෙන සිකුරාදා සිට දැවැන්ත වෘත්තීය ක්‍රියාමාර්ගවලට අවතීර්ණවීමට වරාය වෘත්තීය සමිති තීරණය කර තිබේ.
ඔවුන් පෙන්වා දෙන්නේ නැගෙනහිර ජැටිය බේරාගැනීම සඳහා කළහැකි සහ කළයුතු සියලුම පියවර අනුගමනය කරන බවය.
කොළඹදී ප්‍රවෘත්ති සාකච්ඡාවක් කැඳවමින් ජාතික වෘත්තීය සමිති මධ්‍යස්ථානයේ සභාපති කේ. ඩී. ලාල්කාන්ත මහතා සඳහන් කළේ, "මේ සටනෙදි ඉදිරිපත් කරපු මතවලට ආණ්ඩුවට සිද්ධ වුණා උත්තර බඳින්නන් බවට පත්වෙන්න. දැන් තීරණයක් ගත්තා, සිකුරාදා වෘත්තීය සමිති ක්‍රියාමාර්ග ආරම්භ කරන්න. ප්‍රබල ක්‍රියාමාර්ගවල ආරම්භය සිකුරාදා ගන්නවා. ඉදිරියේදී දැවැන්ත විරෝධතා සමූහයක් රට පුරාම ක්‍රියාත්මක කිරීම සඳහා සැලසුම අද හැදුවා," යනුවෙනි.
වාණිජ හා කර්මාන්ත සේවා ප්‍රගතිශීලි සේවක සංගමයේ ලේකම් ශ්‍යාමල් සුමනරත්න මහතා සඳහන් කළේ, "අපිට මෙතන තියෙන්නේ සියයට 51ත් එක්ක කතා කිරීම හෝ 49 එක්ක කතා කිරීම නෙමෙයි. අපිට මෙතන තියෙන්නේ සියයට සීය ගැන කතා කිරීම. අදානිටත් වඩා අද මේකට ට්‍රයි කරන්නේ ලංකාවේ ඉන්න වරාය තුළ තියෙන බහුජාතික සමාගමක්. ශ්‍රී ලංකා වරාය අධිකාරිය බෝඩ් ලෑල්ලකට පමණක් සීමාකරන්න මේ හදන්නේ. ඒක නොවෙන්න කළයුතු, කළහැකි සියලුම දේ අපි කරනවා," යනුවෙනි.
