ඉකුත් අප්‍රේල් 22 වනදා ඉන්දීය කාෂ්මීරයේ පෙහෙල්ගාම් ත්‍රස්ත ප්‍රහාරයට ප්‍රතිචාර දක්වමින්, ඉන්දියාව විසින් පාකිස්තාන පාලනය යටතේ පවතින කාෂ්මීර කලාපයේ ත්‍රස්තවාදී ඉලක්ක 09ක් වෙත ප්‍රහාර එල්ලකර තිබේ.
ඊයේ (6) මැදියම් රැයේ සිට එල්ලකළ එම ප්‍රහාරවලින් සිවිල් වැසියන් 26 දෙනෙකු ජීවිතක්ෂයට පත්වී තවත් 46 දෙනෙකු තුවාල ලැබූ බව පාකිස්තානය පවසයි.
ඒ අතර ළමුන්ද සිටින බව වාර්තා වේ.
කෙසේ නමුත් ඉන්දීය ප්‍රහාරක යානා 5ක් බිම හෙලූ බවත්, ඉන්දීය ප්‍රහාරයට නිසැක ලෙස ප්‍රතිචාර දක්වන බවත් පාකිස්තාන හමුදාව අවධාරණය කර ඇත.
ඉන්දිය හමුදාව මෙම මෙහෙයුම "ඔපරේෂන් සින්දූර්" ලෙස නම්කර තිබේ.
මෙම ප්‍රහාර මාලාව පාකිස්තාන කාෂ්මීරයේ නිශ්චිත ත්‍රස්තවාදී ඉලක්ක වෙත එල්ල කළ බව ඉන්දියාව පවසයි.
කෙසේ වෙතත් පාකිස්තානය පවසන්නේ, එම ප්‍රහාරයෙන් ඉස්ලාමීය දේවස්ථාන සහ සිවිල් වැසියන්ට දැඩි හානි සිදුවී ඇති බවයි.
ඉන්දීය ප්‍රහාරය නිර්දය ලෙස යුද ප්‍රකාශ කිරීමක් ලෙස හැඳින්වූ පාකිස්තාන හමුදා ප්‍රකාශක අහමඩ් ෆරීෆ් චවුද්රි ඊට නිසි ප්‍රතිචාර දැක්වීම සඳහා පාකිස්තානයට ඇති අයිතිය අවධාරණය කර ඇත.
ඒ පිළිබඳ අදහස් දක්වන අහමඩ් ෆරීෆ්,
"ඉන්දීය ප්‍රහාරය හමුවේ පාකිස්තානයේ ස්වෛරීත්වය සහ භෞමික අඛණ්ඩතාව ආරක්ෂා කරගැනීම සඳහා ප්‍රතිචාර දැක්වීමට අපි අපේ සන්නද්ධ හමුදා, ගොඩබිම් හමුදා සහ ගුවන් හමුදාවන්ට උපදෙස් ලබා දුන්නා.
ඒ අනුව ඉන්දියාවට අයත් රෆාල් වර්ගයේ ප්‍රහාරක යානා 03ක්, එස්.යු. 30 ප්‍රහාරක යානයක් සහ මිග් 29 ප්‍රහාරයක යානයක් මෙන්ම ඩ්‍රෝන යානයක්ද බිම හෙලීමට ඔවුන් සමත් වුණා" යනුවෙන් පැවසීය.
පාකිස්තානය විසින් ඉන්දීය ගුවන්යානා පහක් මේ වනවිට වෙඩිතබා බිමහෙලා ඇති බව පාකිස්තාන හමුදා ප්‍රකාශකයා පවසයි.
කෙසේ වෙතත් ඉන්දීය රජය මේ බව තහවුරු කර නොමැත.
මෙවන් පසුබිමක ජම්මු කාෂ්මීරයේ පුල්වාමා දිස්ත්‍රික්කයේ ගම්මානයකට කඩාවැටී තිබු ප්‍රංශයේ නිෂ්පාදිත ප්‍රහාරක ජෙට් යානයක සුන්බුන්වල දර්ශන ජාත්‍යන්තර මාධ්‍ය වාර්තා කර තිබුණි.
පාකිස්තාන හමුදාව ඉන්දීය කාෂ්මීරයේ දේශසීමා ප්‍රදේශයට ෂෙල් වෙඩි ප්‍රහාර ඉල්ලකර ඇති බවත්, එහිදී සිවිල් වැසියන් දසදෙනෙකු ජීවිතක්ෂයට පත්ව 48 දෙනෙකු තුවාල ලැබූ බව ඉන්දීය පොලීසිය සඳහන් කළේය.
මාධ්‍ය හමුවක් පවත්වමින් ඉන්දීය විදේශ ලේකම් වික්‍රම මිස්රි සඳහන් කළේ පෙහෙල්ගාම් ප්‍රහාරයට පාකිස්තානය සම්බන්ධ බවට ඉන්දීය බුද්ධි සේවාවන් තහවුරු කර ඇති බවය.
පාකිස්තානය ත්‍රස්තවාදීන්ට ක්ෂේම භූමියක් බවත්, ඉන්දියාව මෙම ප්‍රහාර දියත් කළේ දේශසීමාව හරහා එල්ලවන ත්‍රස්තවාදයට ප්‍රතිචාර දැක්වීමට බවත් ඉන්දීය විදේශ ලේකම්වරයා වැඩිදුරටත් පවසා තිබේ.
