2027 අයවැයෙන් සෞඛ්‍ය වෘත්තිකයන්ගේ දීමනා සංශෝධනය කිරීමේදී 2024 වසරේදී රජය සමග ඇති එකඟතා නොසලකා හැරීමෙන් ඇතිවී තිබෙන බරපතළ අසාධාරණයක් සිදුව ඇති බව සෞඛ්‍ය වෘත්තීයවේදීන්ගේ සම්මේලනය පවසයි.
ජනාධිපති අනුර කුමාර දිසානායක මහතා වෙත ලිපියක් යොමු කරමින් ඔවුන් අවධාරණය කර ඇත්තේ, මෙය හුදෙක් දීමනා වැඩිවීමේ ප්‍රමාණය පිළිබඳ ගැටලුවක් නොවන බවය.
රජය සමඟ විධිමත් සාකච්ඡා පවත්වා ඇතිකරගත් එකඟතාවක් ආරක්ෂා කිරීම, සෞඛ්‍ය සේවයේ වෘත්තීන් අතර සාධාරණත්වය පවත්වාගැනීම සහ රාජ්‍ය ප්‍රතිපත්තිවල අඛණ්ඩතාව පිළිබඳ බරපතළ ගැටලුවක් බව සෞඛ්‍ය වෘත්තීයවේදීන්ගේ සම්මේලනය පෙන්වාදෙයි.
කෙසේ වෙතත් ඉදිරිපත් කළ අයවැය මගින් වෛද්‍යවරුන්ගේ DAT දීමනාව තවත් රුපියල් 25,000කින් ඉහළ නැංවීමට යෝජනා කිරීම සාධනීය පියවරක් ලෙස සලකන බවත් එම සම්මේලනය සඳහන් කරයි.
2024 වසරේදී රටේ ආර්ථික අර්බුදය හමුවේ වෘත්තීය සමිති දැක්වූ සහයෝගය සහ නම්‍යශීලීභාවය තවදුරටත් නොසලකා හැරීම පිළිගත නොහැකිය.
මෙම ගැටලුවට සාධාරණ හා කඩිනම් විසඳුමක් ලබා නොදෙන්නේ නම්, සෞඛ්‍ය වෘත්තිකයන්ගේ හිමිකම් ආරක්ෂා කිරීම සඳහා ඉදිරි වෘත්තීය සමිති ක්‍රියාමාර්ග පිළිබඳව තීරණ ගැනීමට සිදුවිය හැකිය.
එවැනි තත්ත්වයක් ඇතිවීම වැළැක්වීම සඳහා ජනාධිපතිවරයා ඍජු මැදිහත්වීමක් සිදු කරන මෙම ගැටලුව විසඳීමට කටයුතු කරනු ඇතැයි අපේක්ෂා කරන බව සෞඛ්‍ය වෘත්තීයවේදීන්ගේ සම්මේලනය අදාළ ලිපියෙහි වැඩිදුරටත් දක්වා ඇත.
