පාකිස්තානයේ පැවැත්වෙන තුන්කොන් එක්දින ක්‍රිකට් තරගාවලියේ ශ්‍රී ලංකාව සහ එංගලන්තය අතර තරගයේ පළමුව පන්දුවට පහරදුන් එංගලන්ත කණ්ඩායම නියමිත පන්දුවාර 50 අවසානයේ කඩුලු 5ක් දැවී ලකුණු 386ක් රැස් කිරීමට සමත් විය.
කාසියේ වාසිය දිනාගත් ශ්‍රී ලංකා කණ්ඩායමේ නායක කුසල් මෙන්ඩිස් පළමුව පන්දුවට පහරදීම සඳහා එංගලන්ත කණ්ඩායමට ආරාධනා කළේය.
එංගලන්ත ඉනිමේ වැඩිම ලකුණු ලාභියා වූ බෙන් ඩකට් පන්දු 132කදී ලකුණු 167ක් රැස් කළේ හතරේ පහර 24ක් සමඟිනි.
ටොම් බැන්ටන් පන්දු 75කදී ලකුණු 74ක් ලබාගත් අතර, නායක හැරී බෘක් ලකුණු 44ක් රැස් කළේය. විල් ජැක්ස් පන්දු 21කදී ලකුණු 30ක් ලබාගනිමින් එංගලන්ත ඉනිමට වේගවත් දායකත්වයක් ලබා දුන්නේය.
ඉනිමේ අවසන් භාගයේදී වේගවත් පිතිහරඹයක නිරත වූ ජෝර්ඩන් කොක්ස් නොදැවී ලකුණු 43ක් සහ සෑම් කරන් නොදැවී ලකුණු 21ක් රැස් කළහ.
ශ්‍රී ලංකාව වෙනුවෙන් පන්දු යැවීමේදී අසිත ප්‍රනාන්දු කඩුලු 2ක් දවාගත් අතර, එෂාන් මාලිංග සහ දුනිත් වෙල්ලාලගේ එක් කඩුල්ල බැගින් දවාගත්හ.
ඒ අනුව තරගය ජයගැනීම සඳහා ශ්‍රී ලංකා කණ්ඩායමට ලකුණු 387ක ඉලක්කයක් හිමිව තිබේ.
