නීතිවිරෝධී ලෙස විදේශීය දුම්වැටි තොගයක් මෙරටට රැගෙන ආ ගුවන් මගීන් දෙදෙනෙකු කටුනායක ගුවන් තොටුපොළ පොලිස් මත්ද්‍රව්‍ය කාර්යාංශයේ නිලධාරීන් විසින් අත්අඩංගුවට ගෙන තිබේ.
මෙම දුම්වැටි තොගයේ වටිනාකම රුපියල් හැට හත් ලක්ෂ පනස් දහසක් පමණ වන බවද සඳහන්.
අත්අඩංගුවට ගත් සැකකරුවන්ගෙන් එක් අයෙකු 37 හැවිරිදි වියේ පසුවන චීන ජාතික ව්‍යාපාරිකයෙක් වන අතර ඔහු මැලේසියාවේ ක්වාලාලම්පූර් නුවර සිට පැමිණි එයාර් ඒෂියා ගුවන් සේවයට අයත් ඒ.කේ.-047 දරන ගුවන් යානයෙන් ඊයේ (26) රාත්‍රී 10.45ට කටුනායක ගුවන්තොටුපොළ වෙත ළඟා වී ඇත.
ඔහු විසින් රැගෙන ආ ගමන් මල්ලේ සඟවා තිබූ චීනයේ නිෂ්පාදිත විවිධ වර්ගයේ දුම්වැටි 15,000ක් අඩංගු දුම්වැටි කාටූන් 75 ක් පොලිස් භාරයට ගෙන තිබේ.
අත්අඩංගුවට ගත් අනෙක් සැකකරු කොළඹ කොලොන්නාව ප්‍රදේශයේ පදිංචි 24 හැවිරිදි ශ්‍රී ලාංකික ව්‍යාපාරිකයෙකි.
ඔහු ඩුබායි සිට පැමිණි ෆ්ලයි ඩුබායි ගුවන් සේවයට අයත් එෆ්.ඉසෙඩ්.-549 දරන ගුවන් යානයෙන් ඊයේ (25) රාත්‍රී 08.20ට කටුනායකට පැමිණ ඇත.
ඔහු රැගෙන ආ ගමන් මලු පරික්ෂා කිරීමේදී එහි සඟවා තිබූ විදේශීය දුම්වැටි 30,000ක් අඩංගු දුම්වැටි කාටූන් 150ක් සොයාගෙන තිබේ.
අත්අඩංගුවට ගත් සැකකරුවන් දෙදෙනා දැනට පොලිස් ඇප මත මුදා හැර ඇති අතර, ඔවුන් හෙට (27) මීගමුව මහේස්ත්‍රාත් අධිකරණය වෙත ඉදිරිපත් කිරීමට නියමිතය.
