පසුගිය ආර්ථික අර්බුදය හා අරගලය තුළින් දූෂිත දේශපාලඥයන් බලයෙන් පහකළ ද, රාජ්‍ය නිලධාරීන් මාරු කිරීමට හෝ ඉවත් කිරීමට ජනතාවට සෘජු ක්‍රමවේදයක් නොමැති බව ජනාධිපති ලේකම් ආචර්ය නන්දික සනත් කුමාරනායක මහතා ප්‍රකාශ කරයි.
රජයේ ආයතනවලින් සිදුවන අකටයුතුකම් හා අසාධාරණකම් සම්බන්ධයෙන් පැමිණිලි කිරීමට සහ ඒ සඳහා විසඳුම් ලබාදීමට රජය විසින් මේ වන විට රාජ්‍ය ආයතන තුළ අභ්‍යන්තර කටයුතු ඒකක පිහිටුවා ඇති බව ඔහු පෙන්වා දෙයි.
ප්‍රජාශක්ති ජාතික ව්‍යාපාරයේ ඉදිරි ක්‍රියාමාර්ග පිළිබඳව දිස්ත්‍රික් ලෙක්ම්වරු, ප්‍රාදේශීය ලේකම්වරු සහ දිස්ත්‍රික් ක්‍රමසම්පාදන අධ්‍යක්ෂවරු දැනුවත් කිරිමේ වැඩසටහනක් ජනාධිපති ලේකම් ආචර්ය නන්දික සනත් කුමානායක මහතාගේ ප්‍රධානත්වයෙන් අරලියගහ මන්දිරයේදි ඊයේ (24) පැවැත්විණ.
එහිදී, දූෂණය යනු කුමක්ද යන්න පිළිබඳව රාජ්‍ය සේවකයන් අතරද පැහැදිලි අවබෝධයක් නොමැති බව පෙන්වා දුන් ඒ මහතා, තමන්ගේ රාජකාරී බලය පෞද්ගලික සුඛවිහරණය සඳහා භාවිතා කිරීම දූෂණයක් ලෙස හැඳින්විය හැකි බව සඳහන් කළේය.
ඉහළ මට්ටමේ සිට මෙම තත්ත්වය සාමාන්‍ය ක්‍රමවේදයක් බවට පත්වීම හේතුවෙන් රට දැඩි ආර්ථික අර්බුදයකට මුහුණ පෑ බවත්, විදේශ ආයෝජන අහිමි වී, අවශ්‍ය නොවන ව්‍යාපෘති නිසා රට දැඩි ණය උගුලක සිරවී ඉන්ධන ආනයනය කරගැනීමට නොහැකි තත්ත්වයට පත් වූ බවත් හෙළි කළේය.
මෙම තත්ත්වය හේතුවෙන් ජනතාව මත දැඩි බදු බරක් පැටවීම, දුප්පත්කම ඉහළ යාම සහ අපරාධ සංඛ්‍යාව වැඩිවීම වැනි බරපතළ සමාජීය ගැටලු උද්ගත වී ඇති අතර, ලෝකයේ දූෂණය වැළැක්වීමේ දර්ශකවලින්ද ශ්‍රී ලංකාව පහළම තැනකට වැටී ඇති බවද පෙන්වා දෙයි.
පෙර අවස්ථාවලදී ජනතාවට තම අදහස් හෝ පැමිණිලි ප්‍රකාශ කිරීමට සුදුසු අවකාශයක් සහ ආරක්ෂාවක් නොතිබූ බැවින් අරගලය වැනි තත්ත්වයන් ඇති වූ බව ලේකම්වරයා සඳහන් කළේය.
එබැවින්, රාජ්‍ය සේවයේ සුපිළිපන්නභාවය වැඩිදියුණු කරමින්, ජනතාවට සිදුවන අසාධාරණකම්වලට එරෙහිව ඉදිරිපත් වීමට පිහිටුවා ඇති අභ්‍යන්තර කටයුතු ඒකක වෙත පැමිණිලි කරන ලෙසත්, ඒ සඳහා අවශ්‍ය මැදිහත්වීම ලබාදෙන ලෙසත් ඔහු වැඩිදුරටත් ඉල්ලා සිටියේය.
