හදිසි විදුලි බිඳ වැටීම හේතුවෙන් ආරක්ෂිත පියවරක් ලෙස අක්‍රීය කරනු ලැබූ නොරොච්චෝලේ ගල් අඟුරු බලාගාරය දින කිහිපයක් යන තෙක් පද්ධතියට සම්බන්ධ නොකරන බව ජාතික පද්ධති ක්‍රියාකරු පුද්ගලික සමාගම පවසයි.
නිවේදනයක් නිකුත් කරමින් එම සමාගම සඳහන් කර ඇත්තේ මෙවැනි තත්ත්වයක් යටතේ මුහුණ දෙන සාමාන්‍ය ආරක්ෂක ක්‍රමවේදවලට යොමුවී ඇති බැවින් දින කිහිපයක් යන තෙක් බලාගාරය පද්ධතියට නැවත සම්බන්ධ නොකරන බවය.
මේ හේතුවෙන් පද්ධතියට අහිමි වන මෙගාවොට් 810ක ධාරිතාව නිසා ඉදිරි දින කිහිපයේදී පාරිභෝගික ජනතාවට අවම බලපෑමක් වන ලෙස විදුලි සැපයුම නිසි කළමනාකරණයකින් යුතුව සැපයීමට ජාතික පද්ධති ක්‍රියාකරු ලෙස කටයුතු සම්පාදනය කර ඇති බවද අදාළ සමාගම සිය නිවේදනය මගින් සඳහන් කර තිබේ.
එමෙන්ම මේ දිනවල පවතින වර්ෂාපතනය හේතුවෙන් ජල විදුලි ජනනය උපරිම අගයක පවත්වා ගැනීමට හැකි වීමත් පද්ධතියේ ඉල්ලුම සාපේක්ෂව අඩුවීමට ඇති ප්‍රවණතාවයන් නිසා ඉදිරි දින කිහිපයේදී පාරිභෝගික ජනතාවට අවම බලපෑමක් වන ලෙස විදුලි සැපයුම නිසි කළමනාකරණයකින් යුතුව සැපයීමට ජාතික පද්ධති ක්‍රියාකරු අපේක්ෂා කරන බවද එම සමාගම පෙන්වා දී තිබේ.
ඊයේ (17) දිනයේදී පෙරවරු 11.43ට පමණ ජාතික විදුලිබල පද්ධතියෙන් ජනන යන්ත්‍රයක් ඉවත්වීමත් සමග ඇතිවූ අසමතුලිතතාවය හේතුවෙන් තත්ත්පර 30කට අඩු කාලයකදී මුළු දිවයිනටම බලපාන පරිදි පද්ධතියේ බිඳ වැටීමක් සිදුවිය.
ඒ අනුව පද්ධතිය යථාවත් කිරීමේ කටයුතු ඉතා කෙටි කාලයක් තුළ ආරම්භ කිරීමට ජාතික පද්ධති ක්‍රියාකරු පුද්ගලික සමාගම කටයුතු කළ අතර ඒ අනුව දහවල් 12.11 වනවිට ප්‍රධාන ජල විදුලි ජනන යන්ත්‍ර පද්ධතියට එකතු කරමින් පද්ධතිය වෙන් වෙන් වශයෙන් කොටස් හතරක් යටතේ සමගාමීව පණ ගැන්වීමට කටයුතු කළ බවත් එම සමාගම පෙන්වා දී තිබේ.
පද්ධතියේ ඒ වන විට පැවැති පද්ධති පාලන මධ්‍යස්ථානයේ පාලනයට නතු නොවන කුඩා විදුලි ජනන ප්‍රභව හේතුවෙන් නැවත සම්බන්ධතාව ලබා දීමේදී අභයෝගාත්මක තත්ත්වයක් උදා වූවද දහවල් 12.37න් ඇරඹි බෙදා හැරීමේ පෝෂක පණ ගැන්වීම් හරහා පස්වරු 3.00 පමණ වන විට ප්‍රධාන රෝහල්, ජල පවිත්‍රතාගාර, ගුවන් තොටුපළ ඇතුළු අත්‍යවශ්‍ය සේවාවන් සඳහා විදුලි සැපයුම ප්‍රතිස්ථාපනය කිරීමට කටයුතු ඛල බවත් ඔවුන් සිය නිවේදනය මගින් සඳහන් කර ඇත.
ඒ අනුව පස්වරු 5.00 වන විට සියලු ග්‍රිඩ් උපපොළවලට විදුලි සම්බන්ධතාවය ලබා දී පාරිභෝගිකයින් බහුතරයකට විදුලි සැපයුම යථාවත් කිරීමට පියවර ගත් බවත් ජාතික පද්ධති ක්‍රියාකරු පුද්ගලික සමාගම පවසයි.
එමෙන්ම ජනන බලාගාරයන් හී ආරක්ෂිත පියවරක් ලෙස යම් ජනන යන්ත්‍රයක් හදිසියේ පද්ධතියෙන් විසන්ධි වීම සාමාන්‍ය තත්ත්වක් බවත් නමුත් එවැනි විසන්ධි වීමක් හෝ වෙනත් බාධාවක් හේතුවෙන් මුළු පද්ධතියම බිඳ වැටීම සාමාන්‍ය තත්ත්වයක් නොවන බවද එම සමාගම සිය නිවේදනය මගින් පෙන්වා දී තිබේ.
ඒ අනුව මෙම සිදුවීමට මූලික වූ නිශ්චිත සිද්ධි දාමය සහ ඒවාට හේතු මොනවාද යන්න හඳුනා ගැනීම සඳහා අභ්‍යන්තර විමර්ශනයක් ආරම්භ කර ඇති බවද ඔවුන් වැඩිදුරටත් පෙන්වා දී තිබේ.
