මෙරට ප්රධාන පෙළේ අපරාධ කල්ලි සාමාජිකයෙකු වන ගමගේ සාරංග ප්රදීප් හෙවත් වැල්ලේ සාරංග නැමැත්තා ඩුබායිහිදී අත්අඩංගුවට ගනු ලැබීය.
මධ්යම අපරාධ විමර්ශන කොට්ඨාසය භාර ජ්යෙෂ්ඨ පොලිස් අධිකාරී කමල් ආරියවංශ, රාජ්ය බුද්ධි සේවයේ නිලධාරියෙක් සහ අපරාධ පරීක්ෂණ දෙපාර්තමේන්තු නිලධාරියෙක් පසුගියදා ඩුබායි රාජ්යයට ගොස් තිබුණේ සංවිධානාත්මක අපරාධ කල්ලි සාමාජිකයෙකු වන ලලිත් කන්නන්ගර නොහොත් 'බස් ලලිත්' අත්අඩංගුවට ගැනීමේ විශේෂ මෙහෙයුම සඳහාය.
සාරංග ප්රදීප් හෙවත් වැල්ලේ සාරංග නැමැති අපරාධකරු සම්බන්ධයෙන් ද විමර්ශන කණ්ඩායම වෙත ඒවන විට තොරතුරු ලැබී තිබුණි.
ඒ අනුව වැල්ලේ සාරංග නැමැත්තා සම්බන්ධයෙන් සොයාගත් සියලු තොරතුරු ද මෙරට විමර්ශන කණ්ඩායම ඩුබායි ආරක්ෂක අංශ වෙත ලබාදී ඇත.
ඩුබායි ආරක්ෂක අංශ සැකකාර වැල්ලේ සාරංග නැමැත්තා සොයා මෙහෙයුම් දියත් කළේ ඒ අනුවය.
එම මෙහෙයුම සාර්ථක වී ඇති අතර මෙරට ප්රධාන පෙළේ අපරාධ කල්ලි සාමාජිකයෙකු වන ගමගේ සාරංග ප්රදීප් හෙවත් වැල්ලේ සාරංග නැමැත්තා ඩුබායිහි ඔහුගේ නිවසේදී අත්අඩංගුවට ගැනීමට එරට ආරක්ෂක අංශ සමත්ව ඇත.
ඩුබායිහි දී අත්අඩංගුවට ගන්නා අවස්ථාවේ දී ඔහු සතුව තිබී කොකේන් සහ අයිස් මත්ද්රව්ය ද සොයාගෙන ඇති බව වාර්තා වේ.
එමෙන්ම ඔහු සමග තවත් පුද්ගලයින් පිරිසක් එරට පොලිසිය විසින් අත්අඩංගුවට ගෙන ඇති බව ද සඳහන්.
වැල්ලේ සාරංග නැමැත්තාට මහා පරිමාණ මත්ද්රව්ය ජාවාරම් සම්බන්ධයෙන් චෝදනා එල්ලව තිබෙන අතර ප්රධාන චෝදනාව ගංජා ජාවාරම වේ.
එසේම, 2018 පෙබරවාරි 15 වැනිදා මෝදර ලෙල්ලම ප්රදේශයේදී මත්ද්රව්යවලට විරුද්ධ වූ කාන්තාවකට වෙඩිතබා ඝාතනය කිරීම ද මොහුට එල්ලවූ තවත් චෝදනාවකි.
සැකකරු 2017 මැයි 30 වැනිදා මෝදර රොක්හවුස් පටුමගේදී තියුණු ආයුධයක් සන්තකයේ ඇතිව වෙරළබඩ පොලිසිය මගින් අත්අඩංගුවට පත්ව ඇති අතර, එමෙන්ම බ්ලූමැන්ඩල් පොලිසිය මගින් 2022 අප්රේල් මස 20 වැනිදා සැකකරු අත්අඩංගුවට ගෙන ඇත්තේ රුසියාවේ නිෂ්පාදිත ගිනි අවියක් සහ උණ්ඩ දෙකක් සන්තකයේ තබාගැනීමට අදාළවය.
2017 වසරේ ජූලි මස 04 වැනිදා මට්ටක්කුලිය ප්රදේශයේ අයුතු ජන රාශියක සාමාජිකයෙක් වීම හා නිවාස 6කට හා ත්රි රෝද රථ 06කට හානි සිදුකර අනර්ථය කිරීමේ චෝදනාවටද මොහු අත්අඩංගුවට පත්ව ඇත.
එසේම සැකකරු 2018 වසරේ පෙබරවාරි මස 15 වැනිදා මට්ටක්කුලිය ප්රදේශයේදී අවුරුදු 15ක පිරිමි දරුවෙක් පැහැරගැනීමක් සම්බන්ධයෙක්ද චෝදනාවට ලක්ව තිබේ.
එසේම මිනිමැරීම් සිද්ධි කිහිපයක් සම්බන්ධයෙන් ද චෝදනා එල්ලවන මෙම සැකකරු 2020 වසරේදී අනීතික අයුරින් විදෙස්ගත වීමට යාමේදී මෙරට ආරක්ෂ අංශ භාරයට පත්ව ඇති බවටත් තොරතුරු වාර්තා වේ.
මෙවන් අපරාධ රාශියක් සිදුකිරීමෙන් අනතුරුව සැකකරු ඩුබායි රාජ්යයට පලාගොස් ඇති බවද සඳහන්.
කෙසේවෙතත් මෙම අත්අඩංගුවට ගැනීම සම්බන්ධයෙන් නිල වශයෙන් මෙරට ආරක්ෂක අංශ දැනුවත් කර නොමැති නොමැති බවද වාර්තා වේ.
