ශ්රී ලංකාවේ කැනඩා රජයේ මහකොමසාරිස් ඉසෙබෙලා මාර්ටින් මහත්මිය, දේශපාලන සහ වෙළඳ කටයුතු උපදේශිකා ග්වෙන් ටෙමෙල් මහත්මිය වරාය, සිවිල් ගුවන්සේවා සහ බලශක්ති අමාත්යය අනුර කරුණාතිලක මහතා සමඟ විශේෂ සාකච්ඡාවක් පවත්වනු ලැබීය.
එහිදී ශ්රී ලංකාව සහ කැනඩාව අතර වරාය, සිවිල් ගුවන්සේවා සහ බලශක්ති ක්ෂේත්රවල සහයෝගීතාව තවදුරටත් පුළුල් කිරීම පිළිබඳව අවධානය යොමු කරන ලදී.
එමෙන්ම වරාය ක්ෂේත්රයේ පවතින ආයෝජන අවස්ථා පිළිබඳව ද මෙහිදී අවධානය යොමු විය.
වරායේ මෙහෙයුම් කාර්යක්ෂමතාව ඉහළ නැංවීම සඳහා නව තාක්ෂණය, ඩිජිටල් යටිතල පහසුකම් වරාය ප්රජා පද්ධතිය, නාවික සේවා සහ තොරතුරු හුවමාරු පද්ධතිය වැනි පද්ධති සංවර්ධනය කිරීමේ අවශ්යතාවය ගැන ද සාකච්ඡා කරන ලදී.
කැනේඩියානු මහකොමසාරිස්තුමිය කොළඹ වරායේ අනාගත සංවර්ධන ව්යාපෘති සඳහා ජාත්යන්තර මූල්ය ආයතන සමඟ පෞද්ගලික අංශයේ සහාය ලබාගැනීම පිළිබඳව ද අදහස් හුවමාරු කරගත්තාය.
බලශක්ති කේෂ්ත්රයේ සංවර්ධන කටයුතු ගැන විමසා සිටි එතුමිය ත්රිකුණාමලය තෙල් ගබඩා පහසුකම් පිළිබඳව ද අවධානය යොමු කළාය.
එහිදී අමාත්යවරයා පිළිතුරු දෙමින්, ත්රිකුණාමලයේ පවතින තෙල් ටැංකි 61 අතරින් ටැංකි 24ක්ම නැවත භාවිතයට ගනිමින් ඉන්ධන ගබඩා කිරීම සහ නාවික ඉන්ධන සැපයීමේ පහසුකම් සංවර්ධනය කිරීමට සැලසුම් කර ඇති බව සඳහන් කළේය.
එමෙන්ම බලශක්ති ක්ෂේත්රයේ සූර්යබල ශක්ති උත්පාදනය සහ බැටරි බලශක්ති ගබඩා කිරීමේ ක්රමවේද හඳුන්වා දෙමින් සංවර්ධන ව්යාපෘති ආරම්භ කර ඇති බව ද ප්රකාශ කළේය.
මෙහිදී මහකොමසාරිස්වරිය විසින් මෙරට වරාය සහ ගුවන්සේවා කේෂ්ත්ර සඳහා අවශ්ය තාක්ෂණික විශේෂඥ දැනුම, පුහුණුව සහ නවීන උපකරණ ලබා දීම සම්බන්ධයෙන් කැනඩාවේ සහාය ලබා දීමට එකඟතාව පළ කළාය.
තවද මෙරට සමඟ ආයෝජන සහ වෙළඳ සබඳතා තවදුරටත් පුළුල් කිරීමට ද කැනඩාව සූදානම් බව ඇය එහිදී අමාත්යවරයා හමුවේ ප්රකාශ කර සිටියාය.
