ඩයමන්ඩ් ලීග් මලල ක්රීඩා තරගාවලියේ ස්විට්සර්ලන්තයේ පැවති 'සූරිච්' අදියරේ ද පිරිමි හෙල්ල විසිකිරීමේ ඉසව්වේ පළමු ස්ථානය දිනාගැනීමට රුමේෂ් තරංග අලුයම සමත්විය.
මෙරට වේලාවෙන් අද (28) අලුයම අවසන් වූ මෙම තරගයේදී රුමේෂ් මීටර් 92.07ක දක්ෂතාවක් දැක්වීය. මෙය රුමේෂ් සිය වෘත්තීය ජීවිතය තුළ මීටර් 92 සීමාව අබිබවා විසිකළ දෙවන අවස්ථාව ලෙස සටහන් වේ.
මෙම වසරේ ජුනි මාසයේ පැවැති රෝම ඩයමන්ඩ් ලීග් තරගාවලියේදී මීටර් 92.62ක දුරක් වාර්තා කරමින් නව ජාතික වාර්තාවක් පිහිටුවීමටද ඔහු සමත් විය.
වත්මන් ලෝක හෙල්ල විසිකිරීමේ ශ්රේණිගත කිරීම්හි පළමු ස්ථානයේ පසුවන 23 හැවිරිදි රුමේෂ්, මෑතකදී නිමාවට පත් වූ පොදුරාජ්ය මණ්ඩලීය ක්රීඩා උළෙලේදීද මීටර් 89.75ක දක්ෂතාවක් දක්වමින් රන් පදක්කම දිනා ගත්තේය.
තරගයේ දෙවන ස්ථානය හිමිවූයේ මීටර් 86.93ක දක්ෂතාවක් දැක්වූ ග්රෙනාඩාවේ හිටපු ලෝක ශූර ඇන්ඩර්සන් පීටර්ස්ටය.
පෝලන්තයේ ඩේවිඩ් වෙග්නර් මීටර් 85.16ක පෞද්ගලික හොඳම දුර වාර්තා කරමින් තෙවන ස්ථානය දිනාගත් අතර, 2012 ලන්ඩන් ඔලිම්පික් ශූර ට්රිනිඩෑඩ් සහ ටොබැගෝ හි කෙෂෝන් වෝල්කොට් (මීටර් 83.02) සිව්වන ස්ථානයටත්, කෙන්යාවේ ජූලියස් යෙගෝ (මීටර් 81.66) පස්වන ස්ථානයටත් පත්විය.
ඉන්දියාවේ නීරාජ් චොප්රා මෙම තරග අදියර සඳහා එක්ව නොසිටියේය.
මෙම වසර තුළ සිය දක්ෂතා අඛණ්ඩ පවත්වාගෙන සිටින අතර, මෙම ජයග්රහණයෙන් එය තවදුරටත් තහවුරු විය.
රුමේෂ් ඔහු මේ වසරේ සහභාගි වූ තරග 12න් තරග 11කම ජය හිමිකරගෙන ඇත. ඊට අඛණ්ඩව ලබාගත් ජයග්රහණ 6ක්ද ඇතුළත් වන අතර, රෝම, ඔස්ට්රාවා සහ දෝහා යන ඩයමන්ඩ් ලීග් අදියරයන්හි ජයග්රහණ හිමිකර ගැනීමට ඔහු සමත්ව තිබේ.
