
පාස්කු ඉරුදින ත්රස්ත ප්රහාර මාලාවේ විමර්ශනවලට අදාළව රැඳවුම් භාරයේ සිටින රාජ්ය බුද්ධි සේවයේ හිටපු අධ්යක්ෂ, විශ්රාමික මේජර් ජෙනරල් සුරේෂ් සලේ මහතාගේ රැඳවුම් නියෝගය තවත් දින 90කට දීර්ඝ කර තිබේ.
ඔහුගේ පළමු දින 90ක රැඳවුම් නියෝගය අවසන් වීමට නියමිතව ඇත්තේ අද මධ්යම රාත්රියෙන්ය.
ඒ අනුව හෙට සිට තවත් දින 90ක් සලේ මහතා රැඳවුම් භාරයේ තබාගෙන ප්රශ්න කිරීමට ආරක්ෂක අමාත්යාංශය අපරාධ පරීක්ෂණ දෙපාර්තමේන්තුවට අවසර ලබාදී තිබේ.
පාස්කු ඉරුදින ත්රස්ත ප්රහාර මාලාව සම්බන්ධයෙන් සිදුකෙරෙන විමර්ශනවලට අදාළව රාජ්ය බුද්ධි සේවයේ හිටපු අධ්යක්ෂ, විශ්රාමික මේජර් ජෙනරල් සුරේෂ් සලේ මහතා පසුගිය පෙබරවාරි 26 වැනිදා අපරාධ පරීක්ෂණ දෙපාර්තමේන්තුව විසින් අත්අඩංගුවට ගනු ලැබීය.
එහිදී පළමුව ඔහුට එරෙහිව පළමුව පැය 72ක රැඳවුම් නියෝගයක් ලබාගැණුනු අතර එය අවසන් වීමෙන් පසු ත්රස්තවාදය වැළැක්වීමේ පනතේ විධිවිධාන ප්රකාරව අපරාධ පරීක්ෂණ දෙපාර්තමේන්තුව භාරයේ දින 90ක කාලයක් රඳවාගෙන ප්රශ්න කිරීමට නියෝග නිකුත් කෙරුණි.
අනතුරුව, 2018 වසරේ නොවැම්බර් 29 වැනිදා වව්නතිව්හිදී පොලිස් නිලධාරින් දෙදෙනෙකු ඝාතනයවීම සහ පාස්කු ඉරුදින ත්රස්ත ප්රහාරයට පසු සයින්දමරුදු පිපිරීම සම්බන්ධයෙන් කළ විමර්ශන නොමඟ යැවීම පිළිබඳ කොටුව මහේස්ත්රාත් අධිකරණය හමුවේ පවතින නඩුවේ සැකකරුවෙකු ලෙස සුරේෂ් සලේ මහතා නම් කිරීමට අපරාධ පරීක්ෂණ දෙපාර්තමේන්තුව කටයුතු කළේය.
ඒ අතරවාරයේ රැඳවුම් භාරයේ සිටියදී තමන්ට අමානුෂික වධහිංසා සිදුවන බව පවසමින් සුරේෂ් සලේ මහතා ආහාර වර්ජනය කරමින් මාරාන්තික උපවාසයක් ආරම්භ කළ අතර පසුව සෞඛ්ය තත්ත්වය අවදානම්සහගත වීම හේතුවෙන් සලේ මහතා රෝහල්ගත කෙරුණි.
ඒ අතරතුර සලේ මහතාට එරෙහි රැඳවුම් නියෝගය දින 90ක කාලය අවසන් වීමෙන් පසු යළි දීර්ඝ නොකරන්නැයි ඔහුගේ බිරිඳ මනෝරි සලේ මහත්මිය සහ සලේ මහතාගේ මව ජනාධිපතිවරයාට ලිපි ද යොමු කර තිබුණි.
ලිපි තුළින් ඉල්ලා තිබුණේ ඔහුගේ රැඳවුම් නියෝගය යළි දීර්ඝ නොකර, ඔහු රක්ෂිත බන්ධනාගාරගත කර ඉදිරි විමර්ශන සිදුකරන ලෙසය.
මෙවැනි පසුබිමක ආරක්ෂක අමාත්යාංශයේ අනුමැතිය මත සුරේෂ් සලේ මහතා සම්බන්ධයෙන් වූ රැඳවුම් නියෝගය හෙට සිට තවත් දින 90ක කාලයක් සඳහා දීර්ඝ කර ඇති බව වාර්තා වෙයි.



















































