ඩුබායි සිට අද (25) මෙරටට රැගෙන ආ සංවිධානාත්මක අපරාධකරුවෙකු සහ මත්ද්රව්ය ජාවාරම්කරුවෙකු වන ලලිත් කන්නංගර නොහොත් 'බස් ලලිත්' නැමැත්තාට එරෙහිව පවතින චෝදනා සම්බන්ධයෙන් පොලීසිය විසින් විශේෂ නිවේදනයක් නිකුත් කර තිබේ.
සැකකරුට එරෙහිව හංවැල්ල, නෙළුවත්තුඩුව, පාදුක්ක, කොස්ගම, කොල්ලුපිටිය සහ මීගොඩ යන ප්රදේශවල සිදුවූ මනුෂ්ය ඝාතන, වෙඩි තැබීම්, කප්පම් ගැනීම් සහ දේපළවලට හානි කිරීම් සම්බන්ධයෙන් චෝදනා රැසක් එල්ල වී ඇත.
මෙම සැකකරු,
2013.09.16 වන දින හංවැල්ල පොලිස් වසමේදී පුද්ගලයෙකුට තියුණු ආයුධයකින් පහරදී තුවාල සිදු කිරීම.
2021 වර්ෂයේ නෙළුවත්තුඩුව ප්රදේශයේ ව්යාපාර ස්ථානයකට ඇතුලු වී ලොරි රථයකට ගිනි තබා අනර්ථය කිරීම.
2021 වර්ෂයේ නෙළුවත්තුඩුව ප්රදේශයේදී ඉහත ව්යාපාරිකයාගේ නිවස ඉදිරිපිට වෙඩි තැබීමක් සිදුකර පුද්ගලයෙකුට බරපතළ තුවාල සිදු කිරීම හා ඝාතනය කිරීමට තැත් කිරීම. (තර්ජනය කර මුදල් ලබා ගැනීමට තැත් කිරීම හා මුදල් ලබා නොදීම හේතුවෙන්)
2022.10.16 දින හංවැල්ල පොලිස් වසමේ පිහිටි නිවසකට ඇතුළු වී පුද්ගලයින් තිදෙනෙකු කපා කොටා බරපතළ තුවාල සිදු කිරීම.
2022.12.18 වන දින හරස් පාර, හංවැල්ල ප්රදේශයේදී පුද්ගලයෙකුට ගිනි අවියකින් වෙඩි තබා මනුෂ්ය ඝාතනයක් සිදු කිරීමට අදාළව ආධාර අනුබල දීම හා කුමන්ත්රණය කිරීම. (අවිස්සාවේල්ල ගරු මහේස්ත්රාත් අධිකරණයේ නඩු කටයුතු විභාග වෙමින් පවතී.)
2023.12.25 දින පාදුක්ක පොලිස් වසමේදී පුද්ගලයින් දෙදෙනෙකු වෙඩි තබා ඝාතනය කිරීම.
2024.03.04 දින හංවැල්ල පොලිස් වසමේදී පුද්ගලයෙකුට වෙඩි තබා ඝාතනය සිදු කිරීම.
2024.09.30 දින නෙළුවත්තුඩුවේ පදිංචි ව්යාපාරිකයෙකු වෙඩි තබා ඝාතනය කිරීම.
2025.07.06 දින කොස්ගම පොලිස් වසමේදී ත්රීරෝද රථයකින් ගමන් ගත් පුද්ගලයින් තිදෙනෙකුට වෙඩි තබා තුවාල සිදු කිරීම.
2025.07.19 දින කොල්ලුපිටිය පොලිස් වසමේ සමාජ ශාලාවක් අසලදී අත්අඩංගුවට ගත් ටී.56 ගිනි අවිය හා උණ්ඩ 25 අදාළ අවිය සමඟ අත්අඩංගුවට ගත් පුද්ගයලයාට ලබා දීම.
2025.08.12 දින මීගොඩ පොලිස් වසමේ යතුරු පැදියකින් ගමන් කරමින් සිටි හිටපු ප්රාදේශීය සභා මන්ත්රීවරයෙකු වෙඩි තබා ඝාතනය කිරීම.
2025.08.13 මීගොඩ පොලිස් වසමේ මුතු හේන පාරේ ස්ථානයකදී ගිනි අවියකින් අහසට වෙඩි තබා පලායාමේ සිද්ධිය මෙහෙය වීම.
යන අපරාධ සම්බන්ධයෙන් මෙම සැකකරු අවශ්යව සිටි අයෙකු බවට වාර්තා වී ඇත.
මෙම සැකකරු විසින් සිදුකරන ලද මත්ද්රව්ය ජාවාරම්, සංවිධානාත්මක අපරාධ මෙන්ම නීති විරෝධී ලෙස උපයාගෙන ඇති බවට සැකකෙරෙන වත්කම් පිළිබඳව ඉදිරියේදී විමර්ශන කිරීමට නියමිත අතර, වැඩිදුර විමර්ශන කටයුතු මධ්යම අපරාධ විමර්ශන කාර්යංශය මගින් සිදු කරනු ලබයි.
