ඩුබායි හි සිට අද (25) මෙරටට රැගෙන ආ සංවිධානාත්මක අපරාධකරුවෙකු සහ මත්ද්‍රව්‍ය ජාවාරම්කරුවෙකු වන ලලිත් කන්නංගර නොහොත් 'බස් ලලිත්' නැමැත්තා සම්බන්ධයෙන් පොලීසියෙන් විශේෂ මාධ්‍ය සාකච්ඡාවක් පවත්වා තිබේ.

එහිදී පොලිස් මාධ්‍ය ප්‍රකාශක, සහකාර පොලිස් අධිකාරී එෆ්. යූ. වුට්ලර් මහතා පැවසුවේ 2025 වසරේ ඔක්තෝබර් 25 වෙනිදා පොලිස්පතිවරයා වෙත ලැබුණු විශේෂ තොරතුරකට අනුව ක්‍රියාත්මක වෙමින් මෙම අත්අඩංගුවට ගැනීම සිදු කළ බවය.

මත්ද්‍රව්‍ය ජාවාරම් කිරීම, මනුෂ්‍ය ඝාතන සිදුකිරීම හා ඊට තැත්කිරීම, බරපතළ තුවාල සිදුකිරීම, කප්පම් ගැනීම් සහ දේපළ ගිනි තැබීම් ඇතුළු බරපතළ චෝදනා රැසක් මොහුට එරෙහිව එල්ල වී ඇති බවද ඒ මහතා වැඩිදුරටත් සඳහන් කර සිටී.

සැකකරු දැනට මධ්‍යම අපරාධ කාර්යාංශයේ නිලධාරීන් භාරයේ රඳවා ගැනීමේ නියෝග මත ඉදිරි විමර්ශන සඳහා යොමුකර ඇති අතර, ඔහුගේ අනීතික දේපළ සම්බන්ධයෙන් නීති විරෝධී වත්කම් විමර්ශන ඒකකය මගින් ද විශේෂ පරීක්ෂණයක් ආරම්භ කර ඇති බව පොලිස් මාධ්‍ය ප්‍රකාශකවරයා පැවසීය.

එමෙන්ම ඒ මහතා සඳහන් කළේ 2024 වසරේ සිට මේ දක්වා කාලය තුළ ජාත්‍යන්තර පොලිසියේ රතු නිවේදන නිකුත් කර තිබූ සැකකරුවන් 42ක් මෙරටට ගෙන්වා ගැනීමට පොලිසිය සමත්ව ඇති බවය.

මේ අතර රතු නිවේදන සහිත තවත් සැකකරුවන් 109දෙනෙකු ඉදිරියේදී මෙරටට ගෙන්වා ගැනීමට නියමිත බව ද මාධ්‍ය ප්‍රකාශකවරයා සඳහන් කළේය.

ඊට අමතරව රතු නිවේදන නොමැතිව සිටි සැකකරුවන් 38දෙනෙකු ද මේ වන විටත් මෙරටට ගෙන්වා ගැනීමට පොලිසිය සමත් වී ඇති අතර, ඉදිරි දින කිහිපය තුළ ද තවත් සැකකරුවන් කිහිපදෙනෙකු ගෙන ඒමට කටයුතු යොදා ඇති බව ඒ මහතා පැවසීය.

පසුගිය වසර තුන තුළ පුද්ගලයින් විසින් නීතිවිරෝධී ලෙස උපයාගත් රුපියල් මිලියන 3,878ක දේපළ රජය සතු කරගැනීමට අවශ්‍ය පියවර ගෙන ඇති බව ද මෙහිදී අනාවරණය විය.

ඒ අනුව, 2024 වසරේදී රුපියල් මිලියන 1,549ක දේපළ රජය සතු කරගෙන අවසන් කර ඇති අතර, 2025 වසරේදී තවත් මිලියන 1,549ක දේපළ සහ 2026 වසරේ ගත වූ මාස කිහිපය තුළ මිලියන 839ක දේපළ රජය සතු කරගැනීමට අවශ්‍ය මූලික කටයුතු සිදුකර ඇති බවද පොලිස් මාධ්‍ය ප්‍රකාශකවරයා සඳහන් කළේය.

ඒ මහතා වැඩිදුරටත් පැවසුවේ මෙම සියලු දේපළ මහාධිකරණයේ විභාග වන නඩුවලින් අනතුරුව අක්‍රිය කර සම්පූර්ණයෙන්ම රජය සතු කර ගැනීමට නියමිත බවය.